ලෝක ක්‍රිකට් පිටියට උරුම සියලුම තරග රටාවන්ගෙන් සමන්විත සම්පූර්ණ ක්‍රිකට් තරගාවලියකට මුහුණදීම සඳහා බංග්ලාදේශ ක්‍රිකට් කණ්ඩායම පසුගියදා දිවයිනට පැමිණියහ. ටෙස්ට් තරග දෙකකින් සමන්විත මෙම තරගාවලිය විස්සයි විස්ස තරග තුනකින් අවසන් වන්නේ එහි මැදට එක්වූ අපූර්ව එක්දින තරග තුනකින් තරගාවලිය රසවත් කරමින්ය. ඒ අනුව තරගාවලිය පුරා මාසයක් තුළ ශ්‍රී ලංකාවේ ක්‍රීඩාංගණ 5 ක් තුළ දී පැවැත්වීමට නියමිතය.
බොහෝ කාලයකට පසුව ශ්‍රී ලංකාවට මෙරටදී පරිපූර්ණ ජාත්‍යන්තර ක්‍රිකට් තරගාවලියක් හිමිවීම නිසා මෙම තරගාවලිය අපගේ ක්‍රිකට් ක්‍රීඩකයන්ට මෙන්ම ක්‍රීඩා ලෝලීන්ට ද එකසේ වැදගත් වනු ඇත. 2025 වසර තුළ වඩාත් හොඳින් ක්‍රීඩාවට අවතීර්ණ වීමට සැලසුම් කරන ශ්‍රී ලංකා කණ්ඩායම මෙන්ම බංග්ලාදේශ කණ්ඩායමටත් මෙම තරගාවලිය අතිශයින්ම වැදගත් වනු ඇත.
තරගාවලිය සුපුරුදු ලෙස මේ මස 17 වැනිදා ගාල්ල ජාත්‍යන්තර ක්‍රිකට් ක්‍රීඩාංගණයේ ඇරඹෙන අතර මෙම තරගය බොහෝ විට ලොව ප්‍රබලතම දඟ පන්දු යවන්නන්ගේ හැකියාව උරගා බැලෙන තරගාවලියක් වනු ඇත. ශ්‍රී ලංකා ටෙස්ට් කණ්ඩායමට නායකත්වය සපයන ධනංජය ද සිල්වාට ජයග්‍රාහි ආරම්භයක් ලබාගැනීමට මෙම පළමු ටෙස්ට් තරගය පැවැත්වෙන ගාලු පිටියේදී බොහෝ විට අවස්ථාවක් හිමිවීමට ඉඩකඩ ඇත.
දෙවැනි ටෙස්ට් ක්‍රිකට් තරගය ජුනි මස 25 වැනිදා ආරම්භ වන්නේ කොළඹ එස්එස්සී ක්‍රීඩාංගනයේදීය.
ශ්‍රී ලංකාව සහ බංග්ලාදේශය අතර පැවැත්වෙන මෙම තරගාවලියට අයත් එක්දින ජාත්‍යන්තර තරග සංඛ්‍යාව 3 කි. ඒ අනුව එහි පළමු තරගය කොළඹ ආර්. ප්‍රේමදාස ජාත්‍යන්තර ක්‍රීඩාංගනයේදී ආරම්භ වන්නේ එළඹෙන ජූලි මස දෙවැනිදාය. එක්දින තරගාවලිය සහ විස්සයි විස්ස ජාත්‍යන්තර තරගාවලිය සඳහා ශ්‍රී ලංකා කණ්ඩායම මෙහෙයවීමේ වගකීම චරිත් අසලංක වෙත පැවරී ඇත. එක්දින තරගාවලියේ දෙවැනි තරගය ජූලි මස 5 වැනිදා ආර්. ප්‍රේමදාස ජාත්‍යන්තර ක්‍රීඩාංගනයේදීම පැවැත්වීමට නියමිතය. තරගාවලියේ තුන්වැනි සහ අවසන් එක්දින තරගය මහනුවර පල්ලෙකැලේ ජාත්‍යන්තර ක්‍රිකට් ක්‍රීඩාංගනයේදී පැවැත්වෙන අතර මෙම එක්දින තරග තුනම දිවා රාත්‍රී තරග ලෙස පවත්වනු ඇත.
තරගාවලියට විස්සයි විස්ස ජාත්‍යන්තර තරග 3 ක් ඇතුළත් අතර එහි පළමු තරගය පල්ලෙකැලේ ජාත්‍යන්තර ක්‍රීඩාංගනයේදී ජූලි මස 10 වැනිදා ආරම්භ කිරීමට නියමිත අතර දෙවැනි තරගය ජූලි 13 වැනිදා දඹුල්ල ජාත්‍යන්තර ක්‍රීඩාංගණයේ පැවැත්වෙයි. අවසන් තරගය ජූලි 16 කොළඹ ආර් ප්‍රේමදාස ජාත්‍යන්තර ක්‍රිකට් ක්‍රීඩාංගනයේදී පැවැත්වීමට නියමිතය.
ඒ අනුව තරග රටා තුනටම අයත් තරග අටකින් සමන්විත මෙම තරගාවලිය මාසයක කාලයකින් අනතුරුව නිමාවට පත්වීමට නියමිතය. පසුගිය කාලය තුළ මෙම කණ්ඩායම් දෙකම මාස කිහිපයක් ජාත්‍යන්තර ක්‍රිකට් පිටියේ තරග අත්දැකීම් නොමැතිව සිටින අතර මෙම තරගාවලිය තුළදී තම උපරිම දක්ෂතා අතරට පැමිණීමට අපේක්ෂාවෙන් සිටින බව පැහැදිළිය. කණ්ඩායම් දෙකම යොවුන් සහ පරිණත වශයෙන් දක්ෂ ක්‍රීඩකයන්ගෙන් සමන්විත අතර තරගාවලියේ ක්‍රීඩාංගණ වාසිය හිමිවන්නේ ශ්‍රී ලංකාවටයි. ඒ අනුව මෙම තරගාවලියේ තරගකාරිත්වය සමඟින් ජයග්‍රහණයක් හිමිකර ගැනීම ශ්‍රී ලංකාවේ අපේක්ෂාව වනු ඇත.
සුනිල් සෝමසිරි
