2025 ටෙස්ට් ලෝක ශූරතා අවසන් තරගයේ තීරණාත්මක දෙවැනි දිනය (13 වැනිදා) නිමාවට පත්විය. ඓතිහාසික ලෝට්ස් ක්‍රීඩාංගණයේදී පැවැත්වෙන මෙම තරගයේ තණතීරුව වේග පන්දු යවන්නන්ගේ පාරාදීසයක් බවට පත්වද්දී දෙවැනි දිනට තරගය නතර කරද්දී දෙපිලේ කඩුලු 14ක් බිඳවැටීම කැපී පෙණෙන සිදුවීමක් විය.
එහිදී දකුණු අප්‍රිකා කණ්ඩායමේ පළමු ඉනිම ලකුණු 138කට සීමා කරන්නට නායක පැට් කමින්ස් ප්‍රමුඛ ඔස්ට්‍රේලියානුවන්ට හැකියාව ලැබුණේ පළමු ඉනිමේ තීරණාත්මක වාසිය සිය කණ්ඩායමට හිමිකර දෙමිනි.
කෙසේ වුවද දෙවැනි දිනට තරගය ආරම්භ කරන විට කඩුලු 4ක් දැවී ලකුණු 43ක් රැස්කරගෙන සිටි දකුණු අප්‍රිකානු කණ්ඩායමට ඔස්ට්‍රේලියා වේග පන්දු බළඇණිය හමුවේ සියලු දෙනා දැවී රැස්කර ගැනීමට හැකියාව ලැබුණේ ලකුණු 138ක් පමණි.
ඔස්ට්‍රේලියානු කණ්ඩායම වෙනුවෙන් විශිෂ්ට පන්දු යැවීමක නිරත වූ පැට් කමින්ස් ලකුණු 28කට කඩුලු 6ක් දවාගැනීමට සමත්විය. ඔහු ඒ අනුව තම ටෙස්ට් ක්‍රිකට් දිවියේ කඩුලු 300 සීමාව පසුකර ගිය අතර, ලෝට්ස් ක්‍රීඩාංගණයේදී කඩුලු 5ක් දවාගත් පළමු සංචාරක නායකයා බවට පත්වන්නට ද ඔහුට අවස්ථාව ලැබිණි.
දකුණු අප්‍රිකා පළමු ඉනිමට වඩා ලකුණු 74ක් ඉදිරියෙන් සිටිමින් සිය දෙවැනි ඉනිම ආරම්භ කළ ඔස්ට්‍රේලියානුවන් දකුණු අප්‍රිකා වේග පන්දු බළඇණිය හමුවේ අසරණ විය.
පන්දු යැවීමේදී කාගිසෝ රබාඩා ලකුණු 44කට කඩුලු 3ක් දවාගැනීමට සමත්වූ අතර, ලුන්ගි න්ගිඩි ලකුණු 35කට කඩුලු 3ක් දවාගැනීමට සමත්විය.
ඒ අනුව දෙවැනි දිනට තරගය නතර කරන විට ඔස්ට්‍රේලියානු කණ්ඩායම සිය දෙවැනි ඉනිම සඳහා කඩුලු 8ක් දැවී ලකුණු 144ක් ලබා සිටියේය.
ඔස්ට්‍රේලියානු කණ්ඩායම තවත් කඩුලු 2ක් අතැතිව ලකුණු 218ක් ඉදිරියෙන් පසුවිය.
සිසිර ඉන්ද්‍රජිත්
