26 වන ආසියානු මලල ක්‍රීඩා තරගාවලියට ශ්‍රී ලංකාව නියෝජනය කරමින් සහභාගි වී, ලෝකඩ පදක්කම් 03 ක් දිනාගත් ජයග්‍රාහී ශ්‍රී ලාංකික ක්‍රීඩක ක්‍රීඩිකාවන් පිරිස 01 දින රාත්‍රී කටුනායක ගුවන් තොටුපළ වෙත පැමිණියහ.
මෙම තරගාවලිය ආසියානු රටවල ක්‍රීඩක ක්‍රීඩිකාවන්ගේ සහභාගිත්වයෙන් ඉකුත් 27 දින සිට 31 දින දක්වා දකුණු කොරියාවේ ගුමි (Gumi) නගරයේ පවත්වා තිබුණි.
එහිදී කාලිංග කුමාරගේ මීටර් 400 සහ මීටර් 400×4 මිශ්‍ර සහාය දිවීමේ තරග ඉසව්වට සහභාගි වී ලෝකඩ පදක්කම් 02 ක් දිනා ගැනීමට සමත් වී සිටියේය.
මීට අමතරව මෙම තරගාවලියේ මීටර් 400×4 කාන්තා සහාය දිවීමේ ඉසව්වෙන් සහ මීටර් 400×4 මිශ්‍ර සහාය දිවීමේ ඉසව්වලට සහභාගි වූ නිෂේන්ද්‍රා ප්‍රනාන්දු, සදෙව් රාජකරුණා, සයුරි මෙන්ඩිස්, නදීශා රාමනායක සහ ජයේෂි උත්තරා යන ශ්‍රී ලාංකික ක්‍රීඩක ක්‍රීඩිකාවන් ද ලෝකඩ පදක්කම් දිනා ගැනීමට සමත් වී සිටියහ.
ඔවුන් 01 දින රාත්‍රී 11.20 ට තායිලන්තයේ බැංකොක් නුවර සිට තායි ගුවන් සේවයේ ටී. ජී.- 307 දරන ගුවන් යානයෙන් කටුනායක ගුවන් තොටුපළ වෙත පැමිණ තිබූ අතර ඔවුන් පිළිගැනීම සඳහා ශ්‍රී ලංකා මලල ක්‍රීඩා සංගමයේ නිලධාරීන්, ත්‍රිවිධ හමුදා ක්‍රීඩා අංශවල නිලධාරීන් මෙන්ම මෙම ක්‍රීඩක ක්‍රීඩිකාවන්ගේ නෑදෑ හිතවතුන් විශාල පිරිසක් ද ගුවන් තොටුපළ වෙත පැමිණ සිටියහ.
කටුනායක ටී. කේ. ජී. කපිල
