තරගයේ වීරයා සම්මානය කුර්නල් පාණ්ඩ්‍යාට
තරගාවලියේ වීරයා සූර්යකුමාර් යාදෙව්
විශිෂ්ටතම උඩපන්දුවට හිමි සම්මානය කමිදු මෙන්ඩිස්ට
වසර 18ක ඉඩෝරය නිමාවට පත්කරමින් අයි.පී.එල්. කුසලානයක පහස විඳගැනීමට ඉන්දීය සුපිරි පිතිකරුවකු වන විරාත් කෝලි ඇතුළු රෝයල් චැලේන්ජස් බැංගලෝර් කණ්ඩායම පෙරේදා රාත්‍රියේ සමත්විය.
ඒ මෙවර ඉන්දීය ප්‍රිමියර් ලීග් තරගාවලියේ අවසාන මහා තරගය වූ රෝයල් චැලේන්ජස් බැංගලෝර් කණ්ඩායම සහ පන්ජාබ් කිංග්ස් කණ්ඩායම සමග පැවැති තරගයෙන්, තියුණු සටනකින් පසු පන්ජාබ් කණ්ඩායම ලකුණු 6කින් පරාජයට පත්කරමිනි.
වාර්තා පොතේ පිටු කිහිපයක්ම පෙරලී ගිය මෙම තරගය පෙරේදා (03දා) අහමදාබාද් හි නරේන්ද්‍ර මෝදි ජාත්‍යන්තර ක්‍රිකට් ක්‍රීඩාංගණයේදී පැවැත්විණි.
ලොව ධනවත්ම ක්‍රිකට් ලීගය ලෙස සැලකෙන අයි. පී. එල්. ක්‍රිකට් තරගාවලියේ 18 වන කූටප්‍රාප්තිය සනිටුහන් කරමින් රෝයල් චැලේන්ජස් බැංගලෝර් කණ්ඩායමේ ප්‍රතිමල්ලවයන් බවට පත්වුණේ පන්ජාබ් කිංග්ස් කණ්ඩායමයි.
අවසාන මහා තරගයේ කාසියේ වාසිය දිනාගත් පන්ජාබ් කිංග්ස් කණ්ඩායමේ නායක ශෙයාර්ස් අයියර් පළමුව පන්දුවට පහරදීමේ වාරය රෝයල් චැලේන්ජ් බැංගලෝර් කණ්ඩායමට භාර කළේය.
ඒ අනුව පිටියට පිවිසි රෝයල් චැලේන්ජ් පිතිකරුවෝ නියමිත පන්දුවාර 20 අවසානයේ කඩුලු 9ක් දැවී ලකුණු 190ක් ලබාගැනීමට සමත්විය.
ඒ අනුව ලකුණු 191ක ඉලක්කයක් හඹායෑම සඳහා පිටියට පිවිසි පන්ජාබ් කිංග්ස් කණ්ඩායම වේගවත් ආරම්භයක් ලබාගත්තේ පළමු පන්දු වාර 8 අවසානයේ ලකුණු 79ක් ලබාගනිමිනි. එහිදී අවසාන තරගයේ හැරවුම් ලක්ෂයේ පන්දු වාර 4 ක්‍රියාත්මක කළ කුර්නල් පාණ්ඩ්‍යා ලකුණු 17කට කඩුලු 2ක් බිඳහෙලමින් තරගය තම කණ්ඩායම දෙසට ඇදගැනීමට සමත්විය. කෙසේ වුවද සටන ලේසියෙන් අතහරින්නට අකමැති වූ ෂශාන්ක් සිංග් පන්ජාබය ජයග්‍රහණය කරා රැගෙන යන්නට තනිව දැඩි සටනක් දියත් කරමින් සිටියේය. පන්ජාබ් කණ්ඩායමට අවසාන පන්දුවාරයේදී හිමිවූ ඉලක්කය ලකුණු 29කි. අවසාන පන්දු වාරය යැවීමේ අභියෝගය භාරගත් ජොස් හේසල්වුඩ් බැංගලෝරයේ එකම පැතුම බවට පත්විය. හේසල්වුඩ් ක්‍රියාත්මක කළ එම පන්දු වාරයේ පළමු පන්දු දෙකටම කිසිදු ලකුණක් ලබා නොදුන් අතර, ඉතිරි පන්දු 4ට ශාෂන්ක් හයේ පහර 3ක් සහ හතරේ පහරක් එල්ල කළද, එය ජයග්‍රහණයට ප්‍රමාණවත් නොවිණි. ඒ අනුව හේසල්වුඩ් බැංගලෝර් කණ්ඩායමේ 18වසරක අයි.පී.එල්. ඉඩෝරයට තිත තැබුවේ විරාත් කෝලි ඇතුළු ක්‍රීඩකයන්ගේ දෙනෙත්ද කඳුළින් තෙත් කරමිනි.
අවසානයේ පන්ජාබයට නියමිත පන්දුවාර 20 අවසානයේ කඩුලු 7ක් දැවී ලබාගැනීමට හැකියාව ලැබුණේ ලකුණු 184ක් වීම හේතුවෙන් ලකුණු 6ක තියුණු ජයක් ලැබීමට රෝයල් චැලේන්ජ් බැංගලෝර් කණ්ඩායමට හැකිවිය.
රෝයල් චැලේන්ජ් බැංගලෝර් කණ්ඩායම වෙනුවෙන් පන්දුවට පහරදීමේදී විරාත් කෝලි ලකුණු 43ක්, රාජත් පතිදර් ලකුණු 26ක්, ලිඅම් ලිවින්ස්ටන් ලකුණු 25ක්, මායාන්ක් අගරවාල් ලකුණු 24ක්, ජිතිෂ් ශර්මා ලකුණු 24ක්, රොමාරියෝ ෂෙෆර්ඩ් ලකුණු 17ක් සහ පිල් සාල්ට් ලකුණු 16ක් ලැබීය. පන්ජාබ් කිංග්ස් කණ්ඩායම වෙනුවෙන් පන්දු යැවීමේදී අර්ෂ්දීප් සිං ලකුණු 40කට කඩුලු 3ක්, කිලී ජේමිසන් ලකුණු 48කට කඩුලු 3ක්, විජයකුමාර් වියාෂ්ක් ලකුණු 30කට 1කඩුල්ලක්, අස්මතුල්හ් ඔමරසායි ලකුණු 35කට 1කඩුල්ලක් සහ යශ්වේන්ද්‍ර චහල් ලකුණු 37කට 1කඩුල්ලක් දවාලීය.
පන්ජාබ් කිංග්ස් කණ්ඩායම වෙනුවෙන් පන්දුවට පහරදීමේදී ෂාශන්ක් සිංග් නොදැවී ලකුණු 61ක්, ජොස් ඉංග්ලිෂ් ලකුණු 39ක්, ප්‍රභාෂිමරන් සිංග් ලකුණු 26ක්, ප්‍රියන්ෂ් ආර්යා ලකුණු 24ක් සහ නිහාල් වදේරා ලකුණු 15ක් ලැබීය.
රෝයල් චැලේන්ජ් බැංගලෝර් කණ්ඩායම වෙනුවෙන් දක්ෂ පන්දු යැවීමක නිරත වූ කුර්නල් පාණ්ඩ්‍යා ලකුණු 17කට කඩුලු 2ක්, බුවනේෂ්වර් කුමාර් ලකුණු 38කට කඩුලු 2ක්, යෂ් ඩයල් ලකුණු 18කට 1කඩුල්ලක්, රොමාරියෝ ශෙෆර්ඩ් ලකුණු 30කට 1කඩුල්ලක් සහ ජොස් හේසල්වුඩ් ලකුණු 58කට 1 කඩුල්ලක් බිඳහෙලීය.
තරගයේ වීරයා ලෙස ලකුණු 17කට කඩුලුරෑ 2ක් බිඳහෙලූ කුර්නල් පාණ්ඩ්‍යා සම්මාන ලැබූ අතර, තරගාවලියේ වීරයාට හිමි සම්මානය මුම්බායි ඉන්දියන්ස් කණ්ඩායම නියෝජනය කළ සූර්යකුමාර් යාදෙව්ට හිමිවිය. තරගාවලියේ විශිෂ්ටතම උඩපන්දුවට හිමි සම්මානය සන්රයිසස් කණ්ඩායම නියෝජනය කළ කමිදු මෙන්ඩිස්ට හිමිවිය. අනුශූර පන්ජාබ් කිංග්ස් කණ්ඩායමට ඉන්දීය රුපියල් කෝටි 12.5ක මුදලක් හිමිවූ අතර, ජයග්‍රාහී රෝයල් චැලේන්ජස් බැංගලෝර් කණ්ඩායමට හිමිවූ මුදලේ වටිනාකම ඉන්දීය රුපියල් කෝටි 20කි.
සිසිර ඉන්ද්‍රජිත්
