ශ්‍රී ලංකා නාමය ඉහළට ඔසවා තබමින් ජාතික හා ජාත්‍යන්තර මලල ක්‍රීඩා පිටියේ විශිෂ්ට දක්ෂතා දක්වන ක්‍රීඩාවේ රජුන් රැජිණියන් දැයට දායාද කළ අධ්‍යාපන කලාපය ලෙසින් කිරුළු පළදින මධ්‍යම පළාතේ වත්තේගම අධ්‍යාපන කලාපයේ කලාප ක්‍රීඩා උළෙල හිටපු ක්‍රීඩා අධ්‍යක්ෂ ජනරාල් සුනිල් ජයවීර මහතාගේ ප්‍රධානත්වයෙන් දිගන පිහිටි මධ්‍යම පළාත් සභා ක්‍රීඩාංගනයේදී (27) පැවැත්විණ.
මෙවර කලාප ක්‍රීඩා උළෙලේ බාලක හා බාලිකා ද්විත්ව ශූරතා හිමිකර ගනිමින් ක්‍රීඩා උළෙලේ සමස්ත ශූරතාවය දිනා ගැනීමට වලල ඒ රත්නායක මාධ්‍ය මහා විදුහල සමත්විය.
මෙම ක්‍රීඩා උළෙලේ සමස්ත බාලිකා ශුරතාවය දිනා ගැනීමට වලල ඒ රත්නායක මධ්‍ය මහා විද්‍යාලය සමත් වූයේ ලකුණු 703 ක් හිමිකර ගනිමිනි. අනු ශූරතාවය ලකුණු 102 සමගින් වත්තේගම බාලිකා විද්‍යාලයත්, තෙවන ස්ථානය ලකුණු 72 හිමිකරගත් පාතදුම්බර මහා විද්‍යාලය සතු විය.
ක්‍රීඩා උළෙලේ සමස්ත බාලක ශුරතාවය දිනා ගැනීමට වලල ඒ රත්නායක මධ්‍ය මහා විද්‍යාලය සමත් වූයේ ලකුණු 410 ක් හිමිකර ගනිමිනි. අනු ශූරතාවය ලකුණු 161 සමගින් මහනුවර ආදර්ශ විද්‍යාලයත්, තෙවන ස්ථානය ලකුණු 101 ලබාගත් මදීනා ජාතික පාසල හිමිකර ගන්නා ලදී.
2025 වර්ෂයේ මෙම ක්‍රීඩා උළෙලේ දක්ෂතම මලල ක්‍රීඩිකාව ලෙස වලල ඒ රත්නායක මාධ්‍ය මහා විද්‍යාලයේ පී. ජී. පී. එම්. දසනායක පිදුම් ලැබූ අතර වසරේ දක්ෂතම ක්‍රීඩකයා ලෙස දිගන හින්දු ජාතික පාසලේ එච්. අභිනි ක්‍රීඩකයා පිදුම් ලැබීය.
වත්තේගම කලාප අධ්‍යාපන අධ්‍යක්ෂ තරංගා ගුණරත්න මහත්මියගේ අධීක්ෂණයෙන් සහකාර අධ්‍යාපන අධ්‍යක්ෂ (ක්‍රීඩා හා ශාරීරික අධ්‍යාපනය) සුසන්ත ප්‍රනාන්දු මහතාගේ මගපෙන්වීම මත මෙම ක්‍රීඩා උළෙල සංවිධානය කොට තිබිණි.
ශ්‍රී ලංකාවේ පිහිටි අධ්‍යාපන කලාප සියය අතරින් විශිෂ්ටතම පාසල් මලල ක්‍රීඩකයන් දැයට දායාද කළ මධ්‍යම පළාතේ වත්තේගම අධ්‍යාපන කලාපය ඉතිහාසයට එක් වනුයේ ශ්‍රී ලංකාව නියෝජනය කරමින් පාසල් ක්‍රීඩිකාවක් ඔලිම්පික් වරම් හිමිකරගත් ප්‍රථම හා එකම අධ්‍යාපන කලාපය ලෙසිනි. එම දක්ෂතාවයට හිමිකම් කියනු ලැබුවේ තරුෂි කරුණාරත්න ක්‍රීඩිකාවය.
මෙම ක්‍රීඩා උළෙල සඳහා වත්තේගම කලාප අධ්‍යාපන අධ්‍යක්ෂ තරංගා ගුණරත්න, මධ්‍යම පළාත් අධ්‍යාපන දෙපාර්තමේන්තුවේ ක්‍රීඩා හා ශාරීරික අධ්‍යාපන අධ්‍යක්ෂ අතුල ජයවර්ධන, සහකාර අධ්‍යාපන අධ්‍යක්ෂ (ක්‍රීඩා හා ශාරීරික අධ්‍යාපන) සුසන්ත ප්‍රනාන්දු, ඔලිම්පික් ක්‍රීඩා උළෙල නියෝජනය කළ තරුෂි කරුණාරත්න ක්‍රීඩිකාව, සහකාර අධ්‍යාපන අධ්‍යක්ෂවරුන්, කලාපයේ පාසල් නියෝජනය කරමින් විදුහල්පතිවරුන්, ගුරු උපදේශකවරුන්, ක්‍රීඩා ගුරුවරුන්, ක්‍රීඩා උපදේශකවරුන් ඇතුළු පිරිසක් එක්ව සිටියහ.
ජානක සම්පත් බණ්ඩාර – ගුන්නෑපාන
