ශ්‍රී ලංකා ගුවන් හමුදා ඊගල්ස් ගොල්ෆ් ලින්ක් හතරවන වතාවට සංවිධානය කරනු ලැබූ කෝඩ්‍රෑන්ගල් කුසලාන කාන්තා සහ පිරිමි අන්තර් සමාජ ගොල්ෆ් තරගාවලිය පසුගියදා චීනවරාය ඊගල්ස් ගොල්ෆ් ලින්ක්හිදී පැවැත්වූ අතර මෙම තරගය සඳහා ශ්‍රී ලංකාවේ ප්‍රමුඛ පෙළේ ගොල්ෆ් ක්‍රීඩා සමාජ 4ක් වන ගුවන් හමුදා ඊගල්ස් ගොල්ෆ් ලින්ක් ක්‍රීඩා සමාජය, රෝයල් කලම්බු ගෝල්ෆ් ක්‍රීඩා සමාජය, වික්ටෝරියා ගෝල්ෆ් ක්‍රීඩා සමාජය හා නුවරඑළිය ගොල්ෆ් ක්‍රීඩා සමාජය සහභාගි විය.
මෙම තරගාවලියේ ප්‍රසාද ලකුණු 295ක් ලබාගනිමින් සමස්ත ශූරතාව දිනා ගැනීමට රෝයල් කලම්බු ගොල්ෆ් ක්‍රීඩා සමාජය සමත් විය. දක්ෂතම ළඟම පහරට හිමි කුසලානය (පිරිමි) රෝයල් කලම්බු ගොල්ෆ් ක්‍රීඩා සමාජයේ තිලක් වනසිංහ මහතා විසින්ද, දක්ෂතම දුරම පහරට හිමි කුසලානය (පිරිමි) ගුවන් හමුදා ඊගල්ස් ගොල්ෆ් ලින්ක් ක්‍රීඩා සමාජයේ ගෲප් කැප්ටන් ප්‍රභාත් විජේකෝන් විසින්ද, දක්ෂතම ළඟම පහරට හිමි කුසලානය (කාන්තා) වික්ටෝරියා ගෝල්ෆ් ක්‍රීඩා සමාජයේ ෆ්‍රැන්සිස්කා ද මෙල් විසින් ද, දක්ෂතම දුරම පහරට හිමි කුසලානය (කාන්තා) රෝයල් කලම්බු ගොල්ෆ් ක්‍රීඩා සමාජයේ දිලිනි හෙන්නායක විසින් දිනාගත් අතර තරගාවලියේ වැඩිම ලකුණු ක්‍රීඩකයා ලෙස රෝයල් කලම්බු ගොල්ෆ් ක්‍රීඩා සමාජයේ කේ. දනුෂන් මහතා ද තරගාවලියේ වැඩිම ලකුණු ලබාගත් ක්‍රීඩිකාව ලෙස ගුවන් හමුදා ඊගල්ස් ගොල්ෆ් ලින්ක් ක්‍රීඩා සමාජයේ මනෝරි ජයකොඩි මහත්මිය ද කුසලාන දිනා ගන්නා ලදි.
