ඉන්දියාවේ තෙළඟානා ප්‍රාන්තයට අයත් හයිද්‍රාබාද් නගරයේ පැවැත්වෙන 72 වැනි ලෝක රූ රැජන -2025 තරගයේ අවසන් මහා තරගය අති උත්කර්ෂවත් අයුරින් අද (31) හයිද්‍රාබාද් නගරයේ පිහිටි ‘හයිටෙක්ස’ ප්‍රදර්ශන ශාලාවේදී පැවැත්වීමට නියමිතය.
මසක පමණ කාලයක් පුරා හයිද්‍රාබාද් නගරයේ පැවති ලෝක රූ රැජන තරගය සඳහා ලොව පුරා රටවලින් රූ රැජනියන් 108 දෙනෙකු සහභාගී වී තිබූ අතර අද පැවැත්වෙන අවසන් මහා තරගය සඳහා මුලින් තරගකාරියන් 40 දෙනෙකු ද පසුව තරගකාරියන් 20 දෙනකු හා අනතුරුව අවසාන වටය සඳහා තරගකාරියන් 08 දෙනකු ද තෝරා පත් කරගැනීමට නියමිතය.
මෙවර ලෝක රූ රැජන තරගයේ අවසන් 40 දෙනා අතරට ශ්‍රී ලංකාව නියෝජනය කරන අනුදි ගුණසේකර ද තේරී පත්ව ඇත. අද පැවැත්වෙන ලෝක රූ රැජන තරගයේ අවසන් මහා තරගය ලොව පුරා රටවල ජාතික රූපවාහිනී සේවාවන් ඔස්සේ මෙන්ම අන්තර්ජාලය ඔස්සේ ද සජීවීව විකාශය කිරීමට කටයුතු යොදා ඇති බව විදෙස් මාධ්‍ය පවසයි. මෙම අවසන් මහා තරගය නැරඹීම සඳහා ලොව පුරා බිලියන දෙකක පමණ ජනගහනයක් එක් වනු ඇතැයි විදෙස් මාධ්‍ය වාර්තා සඳහන් කර තිබේ. මෙම අවසන් මහා තරගයේ විවිධ අංග ඉදිරිපත් කිරීම සඳහා බොලිවුඩ් තරු වන ජැකලින් ෆර්ඩිනන්ඩස් හා ඉෂාන් කටාර් ද සහභාගී වීමට නියමිතව තිබේ. මේ අතර ලෝක රූ රැජන තරගයෙන් ඉවත් වී එහි සංවිධායකයනට එරෙහිව එංගලන්ත රූ රැජන විසින් ඉදිරිපත් කර තිබූ චෝදනා පදනම් විරහිත බව තෙළඟානා ප්‍රාන්ත රජය විසින් සිදු කරන ලද අභ්‍යන්තර විමර්ශනයකදී අනාවරණය වී තිබේ.
ඒමන්ති මාරඹේ
