ගස් කඩා වැටී 18 කට තුවාල: නිවාස 2710 කට හානි
දින 3 කට විදුලිය විසන්ධි වීම් 61,000ක්
අධික වැසි අධික සුළං ඇතුළු අයහපත් කාලගුණ තත්ත්වය හේතුවෙන් දිස්ත්‍රික්ක 14 ක ප්‍රාදේශීය ලේකම් කොට්ඨාස 140 ක පවුල් 2757 කට අයත් පුද්ගලයන් 10,270 දෙනකු පීඩාවට පත්ව ඇතැයි ආපදා කළමනාකරණ මධ්‍යස්ථානයේ අධ්යක්ෂ ප්‍රදීප් කොඩිප්පිලි මහතා “දිවයින” ට පැවැසීය.
මෙම තද සුළං නිසා ගස් අතු කඩා වැටීම් නිසා පුද්ගලයන් 18 දෙනකු තුවාල ලබා ඇතැයි ද හෙතෙම කීය.
එසේම පූර්ණ නිවාස හා අර්ධ නිවාස හානි, 2710 ක් වාර්තා වී ඇතැයි ද ඒ මහතා කියා සිටියේය.
හානියට පත් නිවාසවලට වන්දි ගෙවීමේ කටයුතු දිස්ත්‍රික් ලේකම්වරුන් හා ජාතික ආපදා සහන සේවා මධ්‍යස්ථාන හරහා සිදුවන බවද තවමත් පවුල් 139 ක් ඥාති නිවාසවල රැඳී සිටින බවද ඒ මහතා කියා සිටියේය.
බදුල්ල දිස්ත්‍රික්කයේ ප්‍රදේශ කිහිපයක වැසි සහිත තත්ත්වයක් ඊයේ (01දා) උදෑසන වන විටත් පැවැති බව හෙතෙම පවසයි.
ඊයේ පෙරවරු 8.00 වනවිට ගතවූ දින තුළ අධික වැසි සහ සුළං හමුවේ දිවයින පුරා විදුලිය විසන්ධි වීම් 61,000 කට අධික සංඛ්‍යාවක් වාර්තා වූ බව ලංකා විදුලිබල මණ්ඩලය පවසයි.
මේ අතර, දිවයිනේ නිරිත දිග කොටසේ පවතින වැසි තත්ත්වය ඊයේ සිට ක්‍රමයෙන් අඩුවී යනු ඇතැයි කාලගුණ විද්‍යා දෙපාර්තමේන්තුව පවසයි.
කෙසේ වෙතත්, බස්නාහිර, සබරගමුව, මධ්‍යම සහ වයඹ පළාත්වලත් ගාල්ල සහ මාතර දිස්ත්‍රික්කවලත් අද (02දා) විටින් විට වැසි ඇති වන බව කාලගුණ විද්‍යා දෙපාර්තමේන්තුව කියයි.
මධ්‍යම කඳුකරයේ බටහිර බෑවුම් ප්‍රදේශවලත් උතුරු, උතුරු මැද සහ වයඹ පළාත්වලත්, හම්බන්තොට සහ ත්‍රිකුණාමලය දිස්ත්‍රික්කවලත් විටින් විට හමන පැයට කිලෝමීටර් 30 – 40 ක පමණ තරමක තද සුළං ඇති විය හැකි බවද එම දෙපාර්තමේන්තුව පවසයි.
මේ අතර, බලංගොඩ, මාදොල ප්‍රදේශයේ පිහිටි අවන්හලක් මතට ගසක් කඩා වැටී පෙරේදා (31දා) සිදුවූ අනතුරින් පුද්ගලයන් 7 දෙනකු තුවාල ලබා ඇත. එසේම කුරුණෑගල පොල්පිතිගම කාලාදපිටිය ගම්මානයේ ද නිවාස කිහිපයකට දැඩි සුළඟින් හානි සිදුවී තිබේ.
පිළිමතලාව නගරයට හැමූ දැඩි සුළඟත් සමග පැරණි ගොඩනැඟිල්ලක් ත්‍රීරෝද රථයක් මතට කඩා වැටී පෙරේදා (31දා) අනතුරක් සිදුවිය.
අයහපත් කාලගුණ තත්ත්වය හමුවේ පෙරේදා (31දා) මාතර, වැලිගම, මුදුගමුව ප්‍රදේශයේ ට්‍රාන්ස්ෆෝමරයක් ගිනිගෙන පුපුරා ගොස් තිබේ.
මේ අතර කොළඹ නගරය හරහා අධික වැසි සමග හමාගිය අධික සුළඟින් ගස් 24ක් කඩා වැටී ඇතැයි කොළඹ මහ නගර සභාවේ අධ්යක්ෂ ඉංජිනේරු (ඉඩම් හා පරිසර අංශය) මනෝජ් රණසිංහ මහතා “දිවයින” ට පැවැසීය.
වැල්ලවත්ත, බම්බලපිටිය, මේට්ලන්ඩ් ක්‍රසන්ට්, කොළඹ විජේරාම, තුම්මුල්ල, ග්‍රෑන්ඩ්පාස් යනාදී ප්‍රදේශවලදී මෙම ගස් කඩා වැටීම් සිදුව තිබූ බවද හෙතෙම කීය.
එම කඩා වැටුණු ගස් නගර සභා සේවකයන් යොදවා ඉවත් කිරීමට පියවර ගත් බවද හේ කියා සිටියේය. කොළඹ නගරයේ පැරණි ගස් රැසක් අතු කපා සමබර කිරීමට පියවර ගෙන ඇත.
ප්‍රදීප් ප්‍රසන්න සමරකෝන්, චමින්ද සිල්වා සහ ධර්මසේන වැලිපිටිය
