2025 ලෝක රූ රැජින කිරුළ තායිලන්ත තරගකාරිනිය වූ ඔපල් සුචතා චුංශ්‍රී දිනා ගත්තාය. පෙරේදා (31දා) සවස ඉන්දියාවේ හයිද්‍රාබාද් හි හයිටෙක්ස් සම්මේලන මධ්‍යස්ථානයේ පැවති උත්සවයේදී තායිලන්තයේ ඔපල් සුචතා ලෝක රූ රැජින ලෙස කිරුළු පැළඳුවාය.
තරගකාරී වට ගණනාවකින් පසු 24 හැවිරිදි ඔපල් සුචතා චුංශ්‍රී ලෝක රූ රැජින කිරුළ දිනා ගත් අතර ඇයට ඇමෙරිකානු ඩොලර් මිලියනයක මුදල් ත්‍යාගයක් හිමිවිය. ලෝක රූ රැජින කිරුළ දිනාගත් තායිලන්තයේ පළමු තරගකාරිය ලෙස ඔපල් සුචාතා ඉතිහාසයට එක් වේ. ඇය පියයුරු පිළිකා මර්දනය හා දැනුවත් කිරීම වෙනුවෙන් වූ සංවිධාන සඳහා ස්වේච්ඡාවෙන් ඉදිරිපත් වී සහාය දක්වන අතර වයස අවුරුදු 16 දී ඇය පියයුරු සැත්කමකට මුහුණ දී ඇත. ඔපල්, තමසාට් විශ්වවිද්‍යාලයේ දේශපාලන විද්‍යා පීඨයේ දේශපාලනය සහ ජාත්‍යන්තර සබඳතා පිළිබඳ උපාධියක් හදාරමින් සිටී.
චුංශ්‍රී ආසියාවේ මහාද්වීපික ජයග්‍රාහිකාව ලෙස ද ඉස්මතු වූ අතර එය ඉසව්වේ අවසන් අදියරේදී පිරිනමන ලද මහාද්වීපික ශූරතා හතරෙන් එකකි.
1951 වසරේ මහා බි්‍රතාන්‍යයේදී ඇරඹි ලෝක රූ රැජින තරගයේ 72 වැනි අදියර මෙවර ඉන්දියාවේ තෙළඟනාහිදී ආරම්භ වූයේ මැයි 7 වැනිදාය. මෙවර ලෝක රූ රැජින තරගාවලිය සඳහා තරගකාරිනියන් 108 දෙනකු ඉදිරිපත්ව සිටි අතර ඔවුන් මහද්වීප 4කට බෙදා එක් එක් මහද්වීපයෙන් අවසන් වටයට තරගකාරිනියන් 10 දෙනකු බැගින් තෝරා ගැනුණි. එම මහාද්වීප වෙන්කර තිබුණේ ඇමෙරිකා සහ කැරබියානු, යුරෝපා, අප්‍රිකා, ආසියා සහ ඔෂනියා ලෙසයි.
කිරුළ අහිමි වුවත් අපේ අනුදී තරගාවලිය පුරා දැක්වූ දක්‍ෂතාවලින් හදවත් දිනා ගනී
ශ්‍රී ලංකාව වෙනුවෙන් තරග කළ අනුදි ගුණසේකරට අවසන් 40 දෙනා අතරට පිවිසීමේ හැකියාව අහිමි විය. ඒ අනුව ශ්‍රී ලංකාවේ ලෝක රූ රැජින බලාපොරොත්තුව බිඳවැටුණි. එහෙත් ඇය මේ තරගාවලිය පුරා දැක්වූ දක්ෂතා හේතුවෙන් මෙරට වැසියන්ගේ ගෞරවයට මෙන්ම වීරත්වයට පාත්‍රවී තිබිණි. මෙවර කිරුළ අපට හිමි නොවූවත් අනුදිගේ රංගනය කැපී පෙනෙන දෙයක් විය. ඇය ආඩම්බරයෙන්, අලංකාරයෙන් සහ ශක්තියෙන් ශ්‍රී ලංකාව නියෝජනය කළ අතර ඒ නිසා ඇය ලාංකික හදවත් තුළ ජයග්‍රාහිකාවක් වූවාය.
72 වැනි ලෝක රූ රැජින තරගාවලියේ පසුගියදා පැවැති තරගවලින් කැපී පෙනෙන දක්ෂතා දැක්වීමට අනුදි ගුණසේකර සමත්වූ අතර හෙඩ් ටු හෙඩ් සහ මල්ටිමීඩියා අංශවල අවසන් වටයන් සඳහා සුදුසුකම් ලබාගැනීමට සමත් වූවාය. ඒ මෙරට ඉතිහාසයේ පළමුවරට එම අංශවලින් අවසන් වටයන් සඳහා සුදුසුකම් ලැබූ පළමු ශ්‍රී ලාංකික තරගකාරිනිය බවටද පත්වෙමිනි. අවසන් තරගයට පෙර ජනපති අනුර කුමාර දිසානායක මහතාද ඇයට සුබපතා තිබිණි. ඉන්දියාව නියෝජනය කරමින් තරග කළ නන්දිනි ගුප්තාගේ ද රූ රැජන කිරුළේ බලාපොරොත්තු සුන් විය.
චතුර පමුණුව
