1757 දෙනෙක් පීඩාවට
කොළඹ 10කට තුවාල
හදිසි ආපදා ගැන 117ට කියන්න
නිවාස 3ක් සම්පූර්ණයෙන්ම විනාශයි
තවත් නිවාස 365කට අර්ධහානි
ග්‍රෑන්ඩ්පාස් – දෙමටගොඩට දැඩි බලපෑම්
කොල්ලුපිටියේ ඇලවුණු ගස් ඉවත් කෙරේ
මහරගම ජනාධිපති විදුහලේ තාප්පය බිම
ගොඩගම නිවාස 20කට හානි
විදුලිය බිඳ වැටීම් 29000 පනී
කොළඹ පවුල් 245ක් පීඩාවට
මරදානේ දුම්රිය ටිකට් නිකුත් කරන්නත් බාධා
දුම්රිය මාර්ගවලටත් ගස් කඩා වැටිලා
අදත් තද සුළං
නැවත දැනුම්දෙන තුරු මුහුදු යන්න එපා – කාලගුණයෙන් කියයි
රදැල්ල වතුයායක නාය අවදානමක් පවුල් 27ක් ඉවත් කෙරෙති
අදත් වැසි
දිවයිනට බලපා ඇති අයහපත් කාලගුණික තත්ත්වය හේතුවෙන් ඊයේ (30 වැනිදා) සවස් වනවිට පවුල් 485කට අයත් පුද්ගලයින් 1757 දෙනකු පීඩාවට පත්ව ඇතැයි ආපදා කළමනාකරණ මධ්‍යස්ථානයේ උසස් නිලධාරියෙක් “දිවයින”ට පැවැසීය.
ඒ අනුව කොළඹ ඇතුළු දිස්ත්‍රික්ක 9කට වර්ෂාවෙන් සහ දැඩි සුළං තත්ත්වයෙන් හානි සිදුවී ඇති බවද හෙතෙම කීය. ඒ අනුව ආපදා රැසක් සිදුව ඇතැයි ද කියා සිටියේය.
මෙහිදී නිවාස 3ක් පූර්ණ වශයෙන් හානි සිදු වී තිබූ බවත්, තවත් නිවාස 365කට අර්ධ වශයෙන් හානි සිදුවී ඇතැයි ද ඔහු සඳහන් කළේය.
නිරිත දිග මෝසම් තත්ත්වය සක්‍රීය වීමත් සමග පෙරේදා (29 වැනිදා) සවස් කාලයේ සිට කොළඹ ඇතුළු ප්‍රදේශ කීපයකට අධික වර්ෂාපතනයත් සමග දැඩි සුළං තත්ත්වයක් ද ඇතිවිය.
කොළඹ ඇතුළු අවට ප්‍රදේශ රැසක් හරහා පෙරේදා (29 වැනිදා) රාත්‍රී 10.30ත් 11.00ත් අතර කාලයේ අධික වර්ෂාව සමග හඹාගිය දැඩි සුළඟින් ගස් කඩා වැටීම් හා නිවාස ඇතුළු දේපළ රැසකට බර හානි සිදුවී තිබිණි.
එහිදී සිදුවූ අනතුරුවලින් පුද්ගලයින් 10 දෙනකු පමණ තුවාල ලබා තිබේ.
කොළඹ හරහා අධික වර්ෂාව සමග හඹාගිය දැඩි සුළඟින් ග්‍රෑන්ඩ්පාස් ප්‍රදේශයේ ගස් කඩා වැටීම් හේතුවෙන් නිවාස 13කට හානි සිදුවී තිබිණි.
එමෙන්ම අධික වර්ෂාව සමග හැමූ දැඩි සුළඟින් දෙමටගොඩ සිරිධර්ම මාවතේ ඇඟලුම් කර්මාන්ත ශාලාවක තාප්පයක්ද කඩා වැටී ඇති වූ අනතුරින් කාන්තාවන් දෙදෙනකු ඇතුළු තිදෙනකු තුවාල ලබා කොළඹ ජාතික රෝහලට ඇතුළත් කර තිබේ.
මෙම ආපදා තත්ත්වයන් හේතුවෙන් පීඩාවට පත්ව සිටින පුද්ගලයින්හට තාවකාලික ස්ථානවල රඳවා ඔවුන්ට අවශ්‍ය ආහාරපාන සපයමින් සිටින බව කොළඹ මහ නගර සභාවේ නාගරික කොමසාරිස් පාලිත නානායක්කාර මහතා “දිවයින”ට පැවැසීය.
අධික සුළං තත්ත්වය හේතුවෙන් කොළඹ එස්.එස්.සී. ක්‍රීඩාංගණයේ දැන්වීම් පුවරුවක් ද කඩා වැටී දේපළ හානි සිදුවී ඇතැයි ද හෙතෙම කීය. එසේම ග්‍රෑන්ඩ්පාස් ප්‍රදේශවල කඩාවැටුණු ගස් ඉවත්කිරීමේ කටයුතු නගර සභා, සේවකයින් විසින් සිදුකරමින් පවතින බවද ඒ මහතා කියා සිටියේය.
එමෙන්ම, කොල්ලුපිටිය ප්‍රදේශයේ අධික සුළං නිසා ඇලවී අනතුරුදායක ආකාරයෙන් ඇති ගස් කීපයක්ද නගර සභා සේවකයින් යොදවා ඉවත් කිරීමට කටයුතු කළ බවද ඒ මහතා කීය.
කොළඹ ප්‍රදේශ රැසක විශාල දැන්වීම් පුවරුද මාර්ගවලට කඩාවැටීම නිසා ඊයේ උදෑසන වාහන ගමනා ගමනයට බාධා එල්ල වී තිබිණි.
දෙහිවල රාමනාදන් මාවත අසල නිවසක් මතට හෝටල් ගොඩනැඟිල්ලක තහඩු සහිත විශාල වහලයක් ගැලවී විත් වැටීමෙන් නිවසට දැඩි අලාභහානි සිදුවී තිබිණි.
මහරගම නගරය හරහා පෙරේදා රාත්‍රී හඹාගිය දැඩි සුළඟින් මහරගම ජනාධිපති විදුහලේ තාප්පයද කඩා වැටී තිබේ.
හෝමාගම ප්‍රදේශය හරහා පෙරේදා රාත්‍රී හඹාගිය දැඩි සුළඟින් හෝමාගම ගොඩගම ප්‍රදේශයේ නිවාස 20කට බරහානි සිදුවී තිබේ. එම ප්‍රදේශය හරහා හඹාගිය දැඩි සුළඟින් නිවාස රැසකම වහලවල් සුළඟට ගසාගෙන ගොස් ඇති අතර, දැඩි සුළඟට ගස් ඉදිරී වැටීමෙන් හානි
රැසක්ද සිදුව ඇතැයි ප්‍රදේශවාසීහු කියා සිටියහ.
“වැස්ස සමග එකපාරට සුළඟ ආවා. විනාඩි 5ත් 10ත් අතර කාලයක් වගේ තිබුණා. අපේ වහලවල් ගියා. හිතාගන්න බැරිවුණා. අපේ ගෙවල් විනාශයි. අපි හම්බකරලා හදාගත්තු පැල විනාශයි. දැන් අපට පිහිටවෙන්න” යැයි විපතට පත් ප්‍රදේශවාසීහු කියා සිටියහ.
අධික වැසි, සුළං තත්ත්වය හේතුවෙන් දිවයින පුරා විදුලිය විසන්ධිවීම් රැසක් වාර්තා වී ඇතැයි ලංකා විදුලිබල මණ්ඩලයේ ප්‍රකාශකයෙක් ‘දිවයින’ ට පැවැසීය.
පවතින අයහපත් කාලගුණික තත්ත්වය හේතුවෙන් රට පුරා විදුලිය බිඳවැටීම් 29,015ක් වාර්තා වී ඇතැයි ලංකා විදුලිබල මණ්ඩලය පවසයි.
බිඳවැටුණු විදුලිය යථා තත්ත්වයට පත්කිරීම සඳහා ඊයේ දිනයේ එම සේවකයින් කටයුතු කරමින් සිටින බව එම මණ්ඩලය කියයි.
දිවයිනට බලපෑ අධික වැසි සමග ඇති වූ තද සුළං හා අකුණු සර හේතුවෙන් කොළඹ දිස්ත්‍රික්කයේ පවුල් 245කට අයත් පුද්ගලයින් 1321 දෙනකු පීඩාවට පත්ව ඇතැයි කොළඹ දිස්ත්‍රික් ආපදා කළමනාකරණ ඒකකය පවසයි.
එම දිස්ත්‍රික්කයේ පූර්ණ නිවාස හානි 3ක්ද, අර්ධ නිවාස හානි 239ක්ද වාර්තා වී ඇතැයි ද එම ඒකකය කියයි.
පෙරේදා (29 වැනිදා) රාත්‍රියේ පැවැති අධික වැසි හා සුළං තත්ත්වය හේතුවෙන් දුම්රිය දෙපාර්තමේන්තුවේ කොළඹ ප්‍රාදේශීය ප්‍රවාහන කාර්යාලයේ (මරදාන) වහලයක කොටසක් ගැලවී ගොස් තිබේ.
ඒ හේතුවෙන් මරදාන ප්‍රවේශපත් නිකුත් කරන කාර්යාලයට ද වැසි ජලය පතිත වීමෙන් මරදාන ප්‍රවේශපත් කාර්යාලයේ කටයුතුවලට බාධා එල්ල විය.
ප්‍රවේශපත් නිකුත් කරන ස්ථාන වෙනස් කරමින් ඊයේ එම කාර්යාලයේ කටයුතු සිදුකරමින් පැවතිණි.
වඳුරව සහ කීනවල දුම්රිය ස්ථාන අතර මාර්ගයට ගසක් කඩාවැටීමෙන් දුම්රිය මාර්ගයේ දුම්රිය ධාවනයට බාධා එල්ල වී තිබිණි. එම කඩාවැටුණු ගස ඉවත් කිරීමේ කටයුතු දුම්රිය කම්කරුවන් යොදවා ඊයේ සිදුකරමින් පැවැති බව දුම්රිය දෙපාර්තමේන්තුවේ ප්‍රකාශකයෙක් ‘දිවයින’ට පැවසීය.
එසේම කැලණිවැලි, පුත්තලම, හලාවත යන දුම්රිය මාර්ගවලට ගස් කඩාවැටීමෙන් දුම්රිය ධාවනයට බාධා එල්ල වී තිබූ බව ද හෙතෙම කීය.
බස්නාහිර, සබරගමුව, මධ්‍යම, දකුණ, උතුර, උතුරු මැද සහ වයඹ පළාත්වල සහ ත්‍රිකුණාමලය දිස්ත්‍රික්කයේ විටින් විට හමන තද සුළං අද (31දා) පැයට කිලෝමීටර් 50-60ක් පමණ විය හැකි බව කාලගුණ විiා දෙපාර්තමේන්තුව පවසයි.
එම මුහුදු ප්‍රදේශවලට නැවත දැනුම් දෙනතුරු යාත්‍රා නොකරන ලෙස නාවික හා ධීවර ප්‍රජාවට දැනුම් දේ.
දිවයිනේ අනෙකුත් ප්‍රදේශවල විටින් විට හමන තද සුළං පැයට කිලෝමීටර් 30ත් 40ත් අතර විය හැකි බව ද එම දෙපාර්තමේන්තුව කියයි.
මේ අතර බස්නාහිර, සබරගමුව, මධ්‍යම සහ වයඹ පළාත්වලත්, ගාල්ල සහ මාතර දිස්ත්‍රික්කවලත් අද (31 වැනිදා) විටින් විට වැසි හෝ ගිගුරුම් සහිත වැසි ඇතිවන බව කාලගුණ විiා දෙපාර්තමේන්තුව පවසයි.
බස්නාහිර සහ සබරගමුව පළාත්වලත් නුවරඑළිය, මහනුවර, ගාල්ල සහ මාතර දිස්ත්‍රික්කවලත් ඇතැම් ස්ථානවල මිලිමීටර් 75ට වැඩි තරමක තද වැසි ඇතිවිය හැකි බව ද එම දෙපාර්තමේන්තුව කියයි.
උතුරු මැද පළාතේත්, මන්නාරම සහ හම්බන්තොට දිස්ත්‍රික්කවලත් වැසි වාර කීපයක් ඇතිවිය හැකි බව ද එම දෙපාර්තමේන්තුව පවසයි.
මධ්‍යම කඳුකරයේ නුවරඑළිය දිස්ත්‍රික්කයට බලපා ඇති වැසි සහිත අයහපත් කාලගුණික තත්ත්වයන් මත නුවරඑළිය රදැල්ල සමර්සෙට් වතුයායේ නායයෑමේ අවදානමක් හේතුවෙන් එහි පවුල් 27ක සාමාජිකයන් 120 පමණ ඉවත් කිරීමට පියවර ගෙන ඇති බව නුවරඑළිය ආපදා කළමනාකරණ මධ්‍යස්ථානයේ නිලධාරියෙක් පැවසීය.
මේ අතර පවතින අයහපත් කාලගුණික තත්ත්වයන් සමග හදිසි ආපදා තත්ත්වයක් ඇති වුවහොත් පැය විසිහතර පුරා ක්‍රියාත්මකව පවතින 117 දුරකථන අංකයට දැනුම් දෙන ලෙස ආපදා කළමනාකරණ මධ්‍යස්ථානය ජනතාවගෙන් ඉල්ලා සිටී.
යම් ස්ථානයක හෝ ප්‍රදේශයක ආපදා තත්ත්වයක් ඇතිවුවහොත් ඊට සුදුසු පියවර ගැනීම සඳහා සියලු අංශ සූදානම් කර ඇති බව ද එම මධ්‍යස්ථානය සඳහන් කරයි.
වැසි පැවතිය ද ගංගා පිටාර මට්ටමට පැමිණ නැතැයි වාරිමාර්ග දෙපාර්තමේන්තුව කියයි.
ප්‍රදීප් ප්‍රසන්න සමරකෝන්, චමින්ද සිල්වා, සුජීව තත්සර සහ හැටන් – මනුර සුදත් සෙල්ලහේවා
