එකිනෙකට වෙනස් විකෘති කොවිඩ් ප්‍රභේද රැසක් මේ වනවිට ලොව පුරා ව්‍යාප්ත වෙමින් පවතින බවට ලෝක සෞඛ්‍ය සංවිධානය අනතුරු අඟවා ඇති බැවින් මෙම වෛරස් තත්ත්වයන් මෙරටට ද පැමිණීමේ දැඩි අවධානමක් මතුව ඇතැයි විශේෂඥ වෛද්‍ය චමල් සංජීව මහතා ‘දිවයින ඉරිදා සංග්‍රහය’ට ප්‍රකාශ කළේය.
මේ වනවිට ලොව පුරා ජේ. එන්. 1, එන්. බී. 1.8, එල් එෆ් 7, එල්. පී. 8.1 ආදී නව විකෘති කොවිඩ් වෛරස උප ප්‍රභේද ශීඝ්‍ර ලෙස පැතිරයමින් පවතින බව ද වෛද්‍යවරයා සඳහන් කළේය.
මෙම වෛරස් ප්‍රභේදයන්ගෙන් බොහොමයක් ආසියානු කලාපයන්ට ඇතුළත්ව ඇති බැවින් ඒ පිළිබඳව මෙරට සෞඛ්‍ය බලධාරීන් අවධානය යොමු කර ආසාදන රෝග පාලනයට කඩිනමින් කාර්ය සාධක බළකායක් පිහිටුවීමට පියවර ගත යුතු බව ද වෛද්‍යවරයා පැවසීය.
ඇමරිකා එක්සත් ජනපදය, මහා බ්‍රිතාන්‍ය, ඔස්ට්‍රේලියාව සිට දකුණු ආසියානු කලාපයෙත්, චීනය, හොංකොං, ජපානය, දකුණු කොරියාව, ඉන්දියාව මෙන්ම ප්‍රංශය, තායිලන්තය, වියට්නාමය සහ නෙදර්ලන්තය යන රටවල් දක්වා කොවිඩ් නව උප ප්‍රභේද රෝග ව්‍යාප්තිය වැඩි වී ඇතැයි වෛරස් විද්‍යාඥයන් විසින් තහවුරු කර ඇතැයි ද වෛද්‍යවරයා කියා සිටියේය.
අදාළ රටවල් දැනටමත් මෙම නව කොවිඩ් ප්‍රභේදයේ ගොදුරු බවට පත්ව ඇති අතර එම රටවල පුද්ගලයන් තුළින් බරපතළ රෝග ලක්‍ෂණ ඉස්මතු නොවුවත්, ප්‍රතිශක්තිකරණ ඌනතාවන් පවතින රෝගීන්, දිගුකාලීන බෝ නොවන රෝගවලින් හා පිළිකා රෝගවලින් පෙළෙන රෝගීන්, කුඩා දරුවන්, ගර්භණි මව්වරුන් සහ වැඩිහිටියන් යම් අවධානයකට ලක්ව ඇත.
එය සැලකිල්ලට ගෙන මෙරට සෑම පුද්ගලයකුම මූලික සෞඛ්‍ය ආරක්‍ෂිත ක්‍රම යළි අනුගමනය කිරීම වැදගත් බව ද විශේෂඥ වෛද්‍ය, චමල් සංජීව මහතා වැඩිදුරටත් සඳහන් කළේය.
සුජීව තත්සර
