පාතාල කල්ලි සාමාජික ගනේමුල්ලේ සංජීව මහෙස්ත්‍රාත් අධිකරණ විත්ති කූඩුවේදී වෙඩි තබා ඝාතනය කළ බව කියන වෙඩික්කරු පෙරට්ටුවේදී හඳුනා ගැනීමට සාක්ෂිකරුවන්ට හැකි වී නැත. සැකකරු හඳුනා ගැනීමේ පෙරට්ටුව කොළඹ අතිරේක මහෙස්ත්‍රාත් හර්ෂණ කැකුණවෙල මහතා ඉදිරියේ ඊයේ (04) පස්වරුවේ සිදු කරන ලද අවස්ථාවේ මෙසේ හෙතෙම හඳුනාගෙන නොමැත. කොළඹ ප්‍රධාන මහෙස්ත්‍රාත් තනූජා ලක්මාලී මහත්මිය පසුගිය 21 වැනිදා කළ නියෝගය පරිදි මෙම පෙරට්ටුව ඊයේ පස්වරුවේ සිදු කෙරුණු අතර සැකකාර වෙඩික්කරු වන සමිඳු දිල්ෂාන් නමැත්තා බන්ධනාගාර හා විශේෂ කාර්ය බළකා නිලධාරීන් ගේ දැඩි රැකවල් මැද ආවරණ සහිතව අධිකරණයට ඉදිරිපත් කෙරිණි.
හඳුනා ගැනීමේ පෙරට්ටුවෙන් අනතුරුව සැකකරු ලබන 06 දා දක්වා රක්ෂිත බන්ධනාගාරගත කිරීමට නියෝග කළ අතිරේක මහෙස්ත්‍රාත්වරයා සැකකරු එදින ප්‍රධාන මහෙස්ත්‍රාත් අධිකරණයට ඉදිරිපත් කරන ලෙස ද නියෝග කළේය.
අපරාධය සිදු කළ දින අංක පහ අධිකරණ ශාලාවේ රඳවා සිටි බන්ධනාගාර රැඳවියන් දෙදෙනකු සාක්ෂිකරුවන් ලෙස පෙරට්ටුවට ඉදිරිපත් කර ඇති අතර සාක්ෂිකරුවන් විසින් සැකකරු හඳුනා නොගත් බව සැකකරුගේ නීතිඥවරයා සඳහන් කළේය.
පැමිණිල්ල වෙනුවෙන් කොළඹ අපරාධ කොට්ඨාසයේ නිලධාරීහු පෙනී සිටියහ.
සැකකරුවන් වෙනුවෙන් නීතිඥ අජිත් පතිරණ මහතා ඇතුළු නීතිඥ මණ්ඩලයක් පෙනී සිටියහ.
