යෝධ කුරුල්ලා ගුවන් ගැබේ

ශ්‍රී ලන්කන් ගුවන් සේවය නැවත පුනර්ජීවනය කිරීම සඳහා, ප්‍රංශයේ එයාර් බස් සමාගමේ නිෂ්පාදිත එයාර් බස් ඒ.330 – 243 වර්ගයේ පුළුල් බඳ සහිත (Wi‍de Body) නවතම ගුවන් යානයක් කටුනායක ගුවන්තොටුපළ වෙත ඊයේ (04දා) උදෑසන සම්ප්‍රාප්ත විය.

මෙම ගුවන් යානය ප්‍රංශයේ එයාර් බස් ගුවන් යානා නිෂ්පාදනය කරන ෂටරූ (Chateauroux) ගුවන් තොටුපළේ සිට පැය 11 ක ගුවන් ගමනක යෙදෙමින් ප්‍රධාන ගුවන් නියමු රජීන් රණතුංග මහතා විසින් පදවා ගෙන පැමිණි අතර ගුවන් යානා කාර්යය මණ්ඩලය ලෙස තවත් ඉංජිනේරුවරුන් ඇතුළු 10 දෙනකු ද සහාය දක්වා තිබුණි.

එය ශ්‍රී ලංකා ගුවන් සීමාවට ඇතුළු වූ පසුව, පානදුර, මොරටුව ඔස්සේ එම ප්‍රදේශවල ජනතාවට පහසුවෙන් දැක බලා ගැනීම සඳහා අඩි 1000 ක පමණ උසකින් කටුනායක ගුවන්තොටුපළ දක්වා ධාවනය කිරීමට පියවර ගෙන තිබුණි.

ශ්‍රී ලන්කන් ගුවන් සේවයේ යූ.එල්.- 1202 දරන මෙම ගුවන් යානය උදෑසන 10.00 ට පමණ කටුනායක ගුවන්තොටුපළ වෙත ළඟා වීමෙන් පසුව, ජල ආචාර (Water Salute) පවත්වා පිළිගෙන, ශ්‍රී ලන්කන් ගුවන් සේවයේ බෝයිං – 747 හැංගරය වෙත, රැස්ව සිටි විශාල පිරිසකගේ අත්පොළසන් නාදය මැද සම්ප්‍රාප්ත විය.

මෙම යානය ද සමග මේ වනවිට ශ්‍රී ලන්කන් ගුවන් සේවය සතුව ගුවන් යානා 23 ක් ඇති අතර, ඒවා අතරින් 10 ක් පුළුල් බඳ සහිත ගුවන් යානා වේ. ඉතිරි 13 පටු බඳ සහිත (Narrow Body) ගුවන් යානා වේ. තවත් පුළුල් බඳ සහිත ගුවන් යානා දෙකක් මිලදී ගැනීම සඳහා මේ වනවිට කැබිනට් අනුමැතිය හිමි වී ඇති බව ශ්‍රී ලන්කන් ගුවන් සේවයේ සභාපති සරත් ගනේගොඩ මහතා පිළිගැනීමේ උත්සවයේ දී පැවසීය.

මෙම නවතම ඒ.- 330 ගුවන් යානය තුළ පිරිමැසුම්දායක පංතියේ ආසන (Economy Class) 248 ක් සහ ව්‍යාපාරික පංතියේ ආසන (Busi‍ness Class) 18 කින් සමන්විත වේ.

කටුනායක ගුවන්තොටුපළ ශ්‍රී ලන්කන් හැංගරය වෙත පැමිණීමෙන් පසුව, සර්ව ආගමික ආශීර්වාද කිරීම සඳහා ආගමික පූජකවරුන් ගුවන් යානය වෙත පිවිස කෙටි ආගමික වතාවත් සිදු කළහ.

මෙම නව ගුවන් යානය පැය 04 කට වඩා කාලය වැය වන ඕස්ටේ්‍රලියාව, ලන්ඩන්, පැරිස්, ෆෑන්ක්ෆර්ට්, මැදපෙරදිග චීනය යන ගමනාන්ත වෙත යොමු කිරීමට නියමිතය.

මෙම අවස්ථාවට ගුවන් සේවා නියෝජ්‍ය අමාත්‍ය ජනිත් කොඩිතුවක්කු, ශ්‍රී ලන්කන් ගුවන් සේවයේ සභාපති සරත් ගනේගොඩ, ශ්‍රී ලංකා සිවිල් ගුවන් සේවා අධිකාරියේ සභාපති සුනිල් ජයරත්න, සීමාසහිත ගුවන්තොටුපළ සහ ගුවන් සේවා සමාගමේ සභාපති හර්ෂ අබේවික්‍රම යන මහත්වරුන් ඇතුළු ගුවන් සේවා ක්‍ෂේත්‍රයට සම්බන්ධ විශාල පිරිසක් පැමිණ සිටියහ.

නිශාන් එස්. ප්‍රියන්ත සහ කටුනායක – ටී. කේ. ජී. කපිල