ඇමෙරිකානු ජනාධිපති ඩොනල්ඩ් ට්‍රම්ප් විසින් ඉකුත් අප්‍රේල් මස 02 වැනිදා ලොව පුරා සියලු රටවලට බලපාන අයුරින් පනවනු ලැබූ අධික තීරුබදු ක්‍රියාත්මක කිරීම අවහිර කරමින් නියෝගයක් නිකුත් කිරීමට ඇමෙරිකා එක්සත් ජනපදයේ මෑන්හැටන් ප්‍රදේශයේ පිහිටි ජාත්‍යන්තර වෙළඳ අධිකරණය විසින් ඊයේ (29දා) පියවර ගෙන තිබේ. අදාළ අධිකරණ නියෝගය හරහා වෙන් වශයෙන් ට්‍රම්ප් ජනාධිපතිවරයා විසින් චීනය, මෙක්සිකෝව හා කැනඩාව යන රටවලට එරෙහිව පනවා තිබූ අධික විශේෂ තීරුබදු ක්‍රියාත්මක කිරීමද අවහිර කර තිබේ. මෑන්හැටන් අධිකරණයේ තිදෙනකුගෙන් යුතු විනිසුරු මඬුල්ලක් විසින් අදාළ නියෝගය නිකුත් කර ඇත්තේ එම අධිකරණයේ ට්‍රම්ප් ජනාධිපතිවරයාගේ අධික තීරු බදු පැනවීමේ වැඩපිළිවෙළට එරෙහිව පවරා තිබූ නඩු ගණනාවකින් අදාළ තීරු බදුවල වලංගුභාවය ප්‍රශ්න කිරීම හේතුවෙන් බව විදෙස් මාධ්‍ය පවසයි.
මැන්හැටන් හි අන්තර්ජාතික වෙළඳ අධිකරණයේ ට්‍රම්ප්ගේ අධික තීරු බදුවලට එරෙහිව පනවා ඇති නඩුවලින් තර්ක කර ඇත්තේ ට්‍රම්ප් ජනාධිපතිවරයා ලොව සෑම රටකටම බලපාන පරිදි හදිසි බලතල නීතිය යොදාගෙන අධික තීරුබදු පැනවීමෙන් සිය අධිකාරිය ඉක්මවා ගොස් ඇති අතර එමගින් ඇමෙරිකාවේ වෙළඳ ප්‍රතිපත්තිය ජනාධිපතිවරයාගේ අභිමතය පරිදි, හැසිරවීමට උත්සාහ දරා ඇති බවයි. කෙසේ වුවද මැන්හැටන් ජාත්‍යන්තර වෙළඳ අධිකරණය විසින් සිය අධික තීරුබදු වැඩපිළිවෙළ අවහිර කරමින් ලබාදී ඇති තීන්දුව ප්‍රකාශයට පත් වී විනාඩි කිහිපයක් ගත වූ පසු ඇමෙරිකානු ජනාධිපති ට්‍රම්ප් විසින් එම තීන්දුවට එරෙහිව අභියාචනයක් ඉදිරිපත් කර තිබේ. අධිකරණ තීන්දුව අභියෝගයට ලක් කරමින් අභියාචනයක් ඉදිරිපත් කර ඇති ට්‍රම්ප් ජනාධිපතිවරයා රටේ ජාතික වශයෙන් හදිසි අවස්ථාවක “එයට නිසි ලෙස විසඳුම් ලබාදීම තීරණය කිරීම තේරීපත් නොවූ විනිසුරුවරුන්ගේ කාර්යයක් නොවන බව පවසා තිබේ. මේ අතර ජාත්‍යන්තර වෙළඳ අධිකරණය විසින් ට්‍රම්ප් ජනාධිපතිවරයාගේ අධික තීරුබදු වැඩපිළිවෙළට එරෙහිව ලබාදී ඇති තීන්දුවට අනුව අදාළ තීරුබදු ක්‍රියාත්මක කිරීම නතර කිරීම සඳහා ධවල මන්දිරයට දින 10ක කාලයක් ලබාදී තිබේ. දේශපාලන විචාරකයන්ට අනුව මෙම අධිකරණ තීන්දුව ජනාධිපති ට්‍රම්ප්ගේ ආර්ථික වැඩපිළිවෙළට එල්ල වූ පහරකි. ලොව සෑම රටකම පාහේ මූල්‍ය වෙළෙඳපොළවල් කඩා වට්ටවමින් ඉකුත් අප්‍රේල් 02 වැනිදා ඇමෙරිකානු ජනාධිපතිවරයා විසින් හඳුන්වා දුන් අධික තීරුබදු ප්‍රතිපත්තිය බොහෝ රටවල විවේචනයට ලක්ව තිබිණි. මේ අතර ඇමෙරිකානු ජනාධිපතිවරයාගේ තීරුබදු වැඩපිළිවෙළට එරෙහිව ලබාදී තිබෙන අධිකරණ තීන්දුව හේතුවෙන් ඊයේ දිනයේ ඔස්ටේ්‍රලියාව, නවසීලන්තය, මැලේසියාව, තායිලන්තය ඇතුළු ආසියා හා ශාන්තිකර කලාපීය රටවල මුදල් ඒකකයන් ඇමෙරිකානු ඩොලරයට එරෙහිව කඩා වැටී ඇති බව වාර්තා වේ.
සංස්කරණය – ඒමන්ති මාරඹේ
