මෙම දිනවල ලොව පුරා රටවල් ගණනාවක මතුවෙමින් පවතින කොවිඩ් වසංගත තත්ත්වයන්ට ප්‍රධාන වශයෙන් හේතු වී තිබෙන ‘එන් බී 1:8:1 ’ කොවිඩ් ප්‍රභේදය ලොව පුරා රටවලින් වාර්තා වෙන කොවිඩ් ආසාදිතයන්ගෙන් සියයට 10කට අධික පිරිසකට ආසාදනය වී ඇති බව අනාවරණය වී ඇතැයි ලෝක සෞඛ්‍ය සංවිධානය පවසයි.
අදාළ කොවිඩ් ප්‍රභේදය චීනය හා හොංකොං යන රටවල විශාල වශයෙන් පැතිර ගොස් ඇති බව වාර්තා වී ඇතැයි ලෝක සෞඛ්‍ය සංවිධානය කියයි. මේ වන විට මෙම නව එන් බී 1:8:1 කොවිඩ් ප්‍රභේදය වැඩි වශයෙන් පැතිර ඇති සෙසු රටවල් හා නගර අතර මාලදිවයින, තායිලන්තය හා ඊජිප්තුව යන රටවල ප්‍රකට නිවාඩු නිකේතන සහිත ප්‍රදේශයන් මෙන්ම ඇමරිකා එක්සත් ජනපදයේ නිව්යෝක්, කැලිෆෝනියා ,ඇරිසෝනා, ඔහියෝ යන ප්‍රාන්තයන් හා වොෂින්ටන් නගරය මෙන්ම රෝඩ්ස් දූපත වේ. වර්තමානයේ ගෝලීය වශයෙන් පැතිරෙන මෙම නව කොවිඩ් ප්‍රභේදය මෙයට පෙර පැතිරුණු කොවිඩ් ප්‍රභේදයන්ට වඩා දරුණු බවට වාර්තා වී නොමැති බවත් එම ප්‍රභේදය ද දැනට පවතින ඕනෑම කොවිඩ් එන්නතක් මගින් පාලනය කරගත හැකි බව සෞඛ්‍ය සංවිධානය වැඩිදුරටත් සඳහන් කර තිබේ. වර්තමානයේ පවතින තත්ත්වය මත රටවල් අතර දේශසීමාවන් වසා දැමීමට හෝ සංචරණ සීමාවන් පැනවීම අවශ්‍ය නොවන බවද එම සංවිධානය කියයි.
