ලක්නව් සුපර් ජෙන්ට්ස් කණ්ඩායමේ ආරම්භක පිතිකරු වන මිචෙල් මාෂ්ගේ විශිෂ්ට ඉනිමත්, විල් ඔරෝකි ගේ කැපී පෙණෙන පන්දු යැවීමත් හේතුවෙන් ඉන්දීය ප්‍රිමියර් ලීග් තරගාවලියේ 64වන තරගය ලෙස පැවැති ලක්නව් සුපර් ජෙන්ට්ස් කණ්ඩායම සහ ප්‍රසාද ලකුණු සටහනේ මේ වන විට අංක 01 ස්ථානයේ රැඳී සිටින ගුජරාට් ටයිටන්ස් කණ්ඩායම අතර පැවැති තරගයෙන් ලකුණු 33ක විශිෂ්ට ජයක් ලැබීමට ලක්නව් සුපර් ජෙන්ට්ස් කණ්ඩායම සමත්විය.
ඊයේ (22 දා) අහමදාබාද් හි නරේන්ද්‍ර මෝදි ක්‍රීඩාංගණයේදී පැවැති මෙම තරගයේ ගුජරාට් ටයිටන්ස් කණ්ඩායමේ ඇරයුමින් යුතුව පළමුව පන්දුවට පහරදුන් ලක්නව් සුපර් ජෙන්ට්ස් කණ්ඩායම නියමිත පන්දු වාර 20 අවසානයේ කඩුලු 2ක් පමණක් දැවී ලකුණු 235ක දැවැන්ත ලකුණු පුවරුවක් නිර්මාණය කිරීමට සමත්විය.
ඒ අනුව ලකුණු 236ක ඉලක්කයක් හඹායෑම සඳහා පිටියට පිවිසි ගුජරාට් ටයිටන්ස් කණ්ඩායමට ලබාගැනීමට හැකියාව ලැබුණේ නියමිත පන්දු වාර 20 අවසානයේ කඩුලු 9ක් දැවී ලකුණු 202ක් වීම හේතුවෙන් ලකුණු 33ක ජයක් ලක්නව් සුපර් ජෙන්ට්ස් කණ්ඩායමට හිමිවිය.
ලක්නව් සුපර් ජෙන්ට්ස් කණ්ඩායම වෙනුවෙන් පන්දුවට පහරදීමේදී දිනයේ විශිෂ්ට ඉනිම ක්‍රියාත්මක කළ මිචෙල් මාෂ් පන්දු 64කට මුහුණදෙමින් හයේ පහර 8ක් සහ හතරේ පහර 10ක් සමගින් ලකුණු 117ක් රැස්කර ගැනීමට සමත්විය. ඊට අමතරව නික්ලස් පූරන් නොදැවී ලකුණු 56ක් සහ ඒඩ්න් මාක්‍රම් ලකුණු 36ක් ලැබීය.
පන්දු යැවීමේදී සායි කිෂෝරී ලකුණු 34කට කඩුලු 1ක් සහ අර්ෂාඩ් ඛාන් ලකුණු 36කට 1 කඩුල්ලක් බිඳහෙළීය.
ගුජරාට් ටයිටන්ස් කණ්ඩායම වෙනුවෙන් පන්දුවට පහරදීමේදී ශාරුක් ඛාන් ලකුණු 57ක්, ෂෙෆර්නි රදර්ෆඩ් ලකුණු 38ක්, ශුබ්මන් ගිල් ලකුණු 35ක් සහ ජොස් බට්ලර් ලකුණු 33ක් ලැබීය.
පන්දු යැවීමේදී විල් ඔරෝකි ලකුණු 27කට කඩුලු 3ක්, ආයුෂ් බදෝනි ලකුණු 4කට කඩුලු 2ක් සහ අවිෂ් ඛාන් ලකුණු 51කට කඩුලු 2ක් දවාලීය.
තරගයේ වීරයා ලෙස මිචෙල් මාෂ් සම්මාන ලැබීය.
සිසිර ඉන්ද්‍රජිත්
සංස්කරණය – සුසිල් ජයකොඩි
