ශ්‍රී ලංකාව ශ්‍රේණිගත කිරීම්වල ස්ථාන දෙකක් ඉදිරියට
වසර 16කට පසුව පූනායි කණාඩායමට එරෙහිව ජාත්‍යන්තර පාපන්දු තරගයක් ජයගන්නට ශ්‍රී ලංකා කණ්ඩායමට හැකියාව ලැබිණි. ඒ තායිලන්තයේ බැංකොක්හිදී පැවැති සුහද පාපන්දු තරගයෙන් ගෝල 1-0ක ජයක් වාර්තා කරමිනි.
ශ්‍රී ලංකා කණ්ඩායමට ජය ගෙන ආ ගෝලය තරගයේ 56වන මිනිත්තුවේදී ඩියෝන් පෙරේරා වාර්තා කළේය.
පූනායි කණ්ඩායම ලෝක පාපන්දු ශ්‍රේණිගත කිරීම්වල 185 වැනි ස්ථානයේ පසුවන අතර, ශ්‍රී ලංකා කණ්ඩායම ලද මෙම ජයත් සමග ශ්‍රී ලංකාව 200 වන ස්ථානයේ සිය ස්ථාන දෙකක් ඉදිරියට පැමිණි අතර, ඒ අනුව මේ වන විට ශ්‍රී ලංකා කණ්ඩායම පසුවන්නේ 198වැනි ස්ථානයේ වීම කැපී පෙණෙන සිදුවීමක් විය.
ශ්‍රී ලංකා පාපන්දු කණ්ඩායම 2027 ආසියානු කුසලාන පාපන්දු තරගාවලියේ සුදුසුකම් ලැබීමේ තරග වටයේදී ලබන අඟහරුවාදා (10 දා) චීන තායිපේ කණ්ඩායමට එරෙහිව කොළඹ තුරඟ තරග ක්‍රීඩාංගණයේදී තරගවැදීමට නියමිතය.
මේ අතර 2026 ලෝක කුසලාන පාපන්දු තරගාවලිය සඳහා සුදුසුකම් ලබාගන්නට දකුණු කොරියාවට හැකියාව ලැබිණි. ඒ ආසියානු කලාපීය සුදුසුකම් ලැබීමේ තරගවටයේදී ඉරාකය සමග පැවැති තරගය ගෝල 2-0ක් ලෙස ජයගැනීමත් සමගයි.
මේ අනුව දකුණු කොරියාව අඛණ්ඩව පාපන්දු ලෝක කුසලානයකට සුදුසුකම් ලැබූ 11 වැනි අවස්ථාවද මෙය විය. තවද ඉතිහාසයේ පළමු වතාවට පාපන්දු ලෝක කුසලානයකට සුදුසුකම් ලබාගන්නට උස්බෙකිස්තානයට හැකිවිය. ඒ එක්සත් අරාබි එමීර් රාජ්‍යය කණ්ඩායම සමග පැවැති තරගය ජය පරාජයෙන් තොරව අවසන්වීමත් සමගය.
එමෙන්ම ඕමානය ගෝල 3-0ක් ලෙස පරාජය කළ ජෝර්දානයද පළමු වරට පාපන්දු ලෝක කුසලානයකට සුදුසුකම් ලබාගතේය. 2026 පාපන්දු ලෝක කුසලානය රටවල් 48ක සහභාගිත්වයෙන් පැවැත්වීමට සැලසුම් කර තිබෙන අතර මේ වන විට රටවල් 10ක් ඊට සුදුසුකම් ලබා තිබේ.
සිසිර ඉන්ද්‍රජිත්
සංස්කරණය – සුසිල් ජයකොඩි
