49වන ජාතික මහා ක්‍රීඩා උළෙලේ තෙවන අදියර ලෙස පැවත්වෙන මධ්‍යම පළාත් ක්‍රීඩා උළෙලේ ඇවිදීමේ තරගාවලියේ පිරිමි අංශයේ ජය හිමිකර ගැනීමට මහනුවර දිස්ත්‍රික්කය නියෝජනය කළ ජී. එස්. චන්දික සමත් වූ අතර කාන්තා අංශයේ ජය මහනුවර දිස්ත්‍රික්කයේ කේ. ජී. ජී. ශානිකා අබේතිස්ස විසින් හිමිකර ගන්නා ලදී.
ජාතික මහා ක්‍රීඩා උළෙල නියෝජනය කිරීම සඳහා මධ්‍යම පළාත් කණ්ඩායම තෝරා ගැනීම වෙනුවෙන් පැවති මෙම තරගයේ පිරිමි අංශයේ දෙවන ස්ථානය මහනුවර දිස්ත්‍රික්කයේ ආර්. ජී. ජේ. එන්. නාරම්පනාව හා තෙවන ස්ථානය මහනුවර දිස්ත්‍රික්කයේ කේ. කේ. ජී. සහන් උදාන හිමිකර ගැනීමට සමත් වූ අතර, තරගාවලියේ කාන්තා අංශයේ දෙවන හා තෙවන ස්ථානයන් පිළිවෙලින් මහනුවර දිස්ත්‍රික්කයේ බී. එම්. ඩී. යූ. කේ. ප්‍රනාන්දු හා ඩබ්. එම්. ටී. ටී. වීරසුන්දර හිමිකර ගැනීමට සමත් විය.
මෙම තරගාවලියේ දී මහනුවර, මාතලේ හා නුවරඑළිය යන දිස්ත්‍රික්කයන් නියෝජනය කරමින් කාන්තා හා පිරිමි ක්‍රීඩක ක්‍රීඩිකාවන් විශාල ප්‍රමාණයක් එක්ව සිටි අතර, ජාතික මහා ක්‍රීඩා උළෙල නියෝජනය කිරීම සඳහා පිරිමි අංශයෙන් ක්‍රීඩකයන් 10 දෙනකු හා කාන්තා අංශයෙන් ක්‍රීඩිකාවන් 06 දෙනකු සුදුසුකම් ලබා ගැනීමට සමත් විය.
මධ්‍යම පළාත් ක්‍රීඩා දෙපාර්තමේන්තුවේ අධ්‍යක්ෂ ආර්. යූ. නිශාන්ත මහතාගේ උපදෙස් හා මගපෙන්වීම මත මධ්‍යම පළාත් ක්‍රීඩා දෙපාර්තමේන්තුව විසින් සංවිධානය කරන ලද මෙම තරගාවලියේ සම්බන්ධිකරණ කටයුතු මාතලේ දිස්ත්‍රික් මලල ක්‍රීඩා පුහුණුකරු විශාකා මල්ලව හා යටිනුවර ක්‍රීඩා නිලධාරි ටෙරන්ස් බණ්ඩාර වීරකෝන් විසින් සිදු කරන ලදී.
මෙම තරගය පසුගියදා මහනුවර පැණිදෙනියේ දී පැවැත් වූ අතර මෙම අවස්ථාව සඳහා මධ්‍යම පළාත් ක්‍රීඩා දෙපාර්තමේන්තුවේ මූලස්ථාන දිස්ත්‍රික් ක්‍රීඩා නිලධාරී ලක්ෂ්මන් විජේසේකර, මාතලේ, මහනුවර සහ නුවරඑළිය දිස්ත්‍රික් ක්‍රීඩා නිලධාරීන් ඇතුළු පිරිසක් එක්ව සිටියහ.
ජානක සම්පත් බණ්ඩාර – ගුන්නෑපාන
