නුගගහකිවුල කතගේ නිරුවත් මළ සිරුර ගල් ගුහාවක හිර කරලා

දූෂණ සිද්ධියට චෝදනා එල්ල වූ සුද්දාගේ පුතා ගැන සැකයක්

සැකකරු 2 වැනිදා සිට පලාගිහින්

දොඹගහවෙල, අලුත්ගෙදර, මිරිස්යාය පාර, නුගගහකිවුල පදිංචි 52 හැවිරිදි කාන්තාවකගේ නිරුවත් මළසිරුරක් 04 වැනිදා ගල්ගුහාවක තිබී දොඹගහවෙල පොලිසියට හමුවී ඇත.

මෙලෙස මියගොස් ඇත්තේ රතුරාළ පුෂ්පා රංජනී නමැති අවිවාහක කාන්තාවකි.

ඇය මීට මාස 08කට පෙර ඇයගේ සහෝදරිය සමග විත් නුගගහකිවුල නිවසේ පදිංචිව සිට තිබේ.

මියගිය අයට මානසික රෝගයක් තිබී ඇති අතර ඇය ප්‍රතිකාර ලබා ගැනීමෙන් පසුව සහෝදරිය වන නැගණිය ඇයගේ නිවාස පිහිටි සියඹලාණ්ඩුව මඩුගම සත්සර නිවසට ගොස් ඇත.

එසේ ගියත් සහෝදරියට දුරකථනයෙන් අමතා සුවදුක් නිතර විමසා තිබේ.

මැයි 31 ජුනි 01 සහ 02 සාහෝදරිය ඇයට දුරකථනයෙන් කතා කළත් දුරකථනය ක්‍රියා විරහිත තත්ත්වයේ තිබී ඇත.

පසුව ඇය ඇයගේ අනෙක් සහෝදරිය සමග නුගගහකිවුල නිවසට පැමිණ තිබේ.

නිවසේ ඉදිරිපස දොරඅගුළු දමා තිබුණත් පිටුපස දොර විවෘතව තිබී ඇත.

ඔවුන් දෙදෙනා නිවස තුළට ගොස් බැලීමේදී මරණකාරිය නිදාගන්නා කාමරයේ ඇඳේ කොට්ටය බිම තිබී ඇති අතර කාමරයේ ඇඳුම් ද බිම වැටී තිබෙනු දැක ඇත.

ඇය පිළිබඳව සොයා බලා තොරතුරක් සොයා ගැනීමට නොහැකිවූ බැවින් දොඹගහවෙල පොලිසියට පැමිණිලි කර තිබේ.

දොඹගහවෙල පොලිස් ස්ථානාධිපති (වැඩ බලන) එල්.එච්.එස්. සිල්වා මහතා ඇතුළු නිලධාරීන් කණ්ඩායමක් විමර්ශන සිදුකර ඇති අතර ජූනි 04 වැනිදා ප්‍රදේශවාසීන් සමග එක්ව කළ සොයා බැලීමක දී නුගගහකිවුල කැලෑබද කඳු ප්‍රදේශයක ගල්ගුහාවක තිබී මියගිය අයගේ යැයි සැක කෙරෙන නිරුවත් මළසිරුර සොයාගෙන ඇත.

යම් පුද්ගලයකුගේ මැදිහත්වීමෙන් ගුහාවේ පිවිසුම ගල් සිරකර වසා දමා ඇති බවත් නිරීක්ෂණය වී තිබේ.

අතුරුදන් වූ කාන්තාව 2025 ජනවාරි මාසයේ දී බදුල්ලේ සුද්දා නමැත්තාගේ පුතා වන දොඹගහවෙල නුගගහකිවුල පදිංචි 27 හැවිරිදි පුද්ගලයකු විසින් දූෂණය කිරීම සම්බන්ධයෙන් නඩු කටයුත්තක් ද තිබේ.

ඔහු ජුනි 02 වැනිදා සිට ප්‍රදේශයෙන් පලා ගොස් ඇත.

මොහු මෙම ඝාතනය සිදුකරන්නට ඇතැයි පොලිසිය සැකකරයි. සැකකරු අත්අඩංගුවට ගැනීමට පොලිසිය පරීක්ෂණ ආරම්භ කර ඇත. මෙම ඝාතනය සම්බන්ධයෙන් මහෙස්ත්‍රාත් පරීක්ෂණය සියඹලාණ්ඩුව වැඩබලන මහෙස්ත්‍රාත් කසුන් හේරත් මහතා විසින් පවත්වන ලදී. පශ්චාත් මරණ පරීක්ෂණය මොනරාගල දිස්ත්‍රික් මහ රෝහලේ විශේෂඥ අධිකරණ වෛද්‍ය නිලධාරී ඩබ්ලිව්. ඒ. සී. ලල්මාලී මහත්මිය විසින් පැවැත්වීමට නියමිතව තිබිණි.

මොනරාගල ජ්‍යෙෂ්ඨ පොලිස් අධිකාරී කමල් ගුණවර්ධන මහතාගේ උපදෙස් මත සියඹලාණ්ඩුව ප්‍රදේශය භාර සහකාර පොලිස් අධිකාරී කුමාර කුලරත්න මහතාගේ මෙහෙයවීම යටතේ දොඹගහවෙල පොලිස් ස්ථානාධිපති (වැඩබලන) එල්.එච්.එස්. සිල්වා මහතා පරීක්ෂණ පවත්වයි.

බඩල්කුඹුර – රවිඳු ගුණතිලක