යාපනය චෙම්මනි මිනිස් අස්ථි කොටස් හමුවූ ප්‍රදේශයේ කැණීම් කටයුතුවලදී පුද්ගල සිරුරු 18කට අයත් අස්ථි කොටස් හමුව ඇති බව කැණීම් කටයුතු සිදු කරන නිලධාරීහු වාර්තා කර සිටිති.
යාපනය චෙම්මනි සිත්තුපාත්තු සුසාන භූමිය ප්‍රදේශයේ සංවර්ධන කටයුතුවල නිරත වූ කම්කරුවන් පිරිසකට ඉකුත් පෙබරවාරි මාසයේදී අස්ථි කොටස් හමුව ඇති අතර පසුව එහි කැණීම් කටයුතු ආරම්භ කරන ලදී. ඒ අනුව දෙවන අධියරේ පස්වන දිනයට කැණීම් කටයුතු සිදු කිරීමේදී මෙසේ සිරුරු 18කට අයත් අස්ථි කොටස් හමුව තිබේ.
මෙම අස්ථි කුමන කාලයකට අයත් ද ඒවා කාගේ ද යන්න පිළිබඳ සෙවීමට පරීක්ෂණ ක්‍රියාත්මකව පවතියි. මෙම අස්ථි පොළොව මට්ටමේ සිට අඩි 03ක ගැඹුරකින් හමුව තිබේ. ඒ අනුව මෙම මරණ සැකසහිත බව උතුරේ අතුරුදන්වූවන්ගේ ඥාතීහු සඳහන් කර සිටිති. මෙම කැණීම් කටයුතු යාපනය මහෙස්ත්‍රාත්වරයාගේ අධීක්ෂණය යටතේ මහාචාර්ය රාජ් සෝමදේව මහතාගේ ප්‍රධානත්වයෙන් සිදු කරනු ලබයි.
මුලතිව් – ප්‍රසන්න ප්‍රදීප්
