කෝටියකට අධික වටිනාකමින් යුත් වාහන ගින්නෙන් දැවී අළුවෙයි
මෝටර් රථයකුත් ඒ අතර
දෙමටගොඩ “සියපත් සෙවණ” මහල් නිවාස සංකීර්ණය අසල රථගාලේ නවතා තිබූ රුපියල් කෝටියකට අධික වටිනාකමින් යුත් ත්‍රිරෝද රථ 6ක් සහ මෝටර් රථයක ඉදිරිපස බොනට්ටුව ප්‍රදේශය ඊයේ (06 වැනිදා) අලුයම ගිනිගෙන දැවී අළු වී ඇතැයි දෙමටගොඩ පොලිසිය පවසයි.
එම ගිනිගැනීම හේතුවෙන් කිසිදු පුද්ගලයකුට ජීවිත හානියක් සිදුවී නැතැයි පොලිසිය කියයි. ගින්න මැඬපැවැත්වීමට කොළඹ මහ නගර සභාවේ ගිනි නිවීමේ ඒකකයේ රථ 2ක් පැමිණ ගින්න පැය 2 1/2ක කාලයක දී මැඬපැවැත් වූ බව පොලිසිය පවසයි.
ගින්න නිවාදැමූවද ඒ වනවිටත් ත්‍රිරෝද රථ අළු වී තිබූ බවද පොලිසිය කියයි.
මෙම ගින්න ඊයේ අලුයම 3.00ට පමණ හටගෙන තිබූ බවද පොලිසිය කියයි.
ගින්න හටගත් මොහොතේ එම ස්ථානයට රැස්වූ අනෙක් වාහන 100ක පමණ පිරිස් තම රථ වහා එම ස්ථානයෙන් ඉවත් කරගැනීමට පියවර ගත් බවත්, එසේ නොවූයේ නම් අනෙකුත් රථවලටත් ගින්න පැතිරී විශාල විනාශයක් සිදුවීමට ඉඩකඩ තිබූ බවද පොලිසිය පවසයි. සී.සී.ටී.වී. දර්ශන ඔස්සේ සිදුකළ විමර්ශනවලට අනුව එක් ත්‍රිරෝද රථයක බැටරියක සිදුවූ කාන්දුවක් සමග ගින්නක් හටගෙන තිබූ බවත්, පසුව එම ත්‍රිරෝද රථයෙන් අනෙක් ත්‍රිරෝද රථවලට ගින්න පැතිරී යන අයුරුත් දක්නට ලැබුණු බව පොලිසිය කියයි.
මෙම සිද්ධියෙන් ත්‍රිරෝද රථ රියැදුරන් කීපදෙනකු දැඩි අපහසුතාවට පත්ව ඇතැයි පොලිසිය පවසයි. මේ පිළිබඳව දෙමටගොඩ පොලිසියේ ස්ථානාධිපති ප්‍රධාන පොලිස් පරීක්ෂක කපිල බණ්ඩාර මහතාගේ උපදෙස් මත පොලිස් පරීක්ෂක විජිතානන්ද, පොලිස් සැරයන් සමරජීව (2830), පොලිස් කොස්තාපල් නිල්නුවන් (101487) යන නිලධාරීහු වැඩිදුර පරීක්ෂණ සිදුකරති.
ප්‍රදීප් ප්‍රසන්න සමරකෝන්
