රුපියල් පනස් එක් කෝටි හැට එක් ලක්ෂ පනස් දහසක් වටිනා කොකේන් මත්ද්‍රව්‍ය තොගයක් රැගත් විදේශීය ගුවන් මගී කාන්තාවක් ඊයේ (30 දා) අලුයම කටුනායක ගුවන් තොටුපොළ පැමිණීමේ පර්යන්තයේ දී, රේගු මත්ද්‍රව්‍ය පාලන අංශයේ නිලධාරීන් පිරිසක් විසින් අත්අඩංගුවට ගන්නා ලදි.
38 හැවිරිදි ඇය, ස්වයං රැකියාවක නිරත තායිලන්ත ජාතික කාන්තාවකි.
ඇය ඊයේ (30 දා) අලුයම 02.00 ට කටාර් රාජ්‍යයේ දෝහා සිට කටාර් ගුවන් සේවයේ කිව්.ආර්.- 662 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබුණි.
ඇය විසින් රැගෙන ආ ගමන් මල්ල තුළ, රෙදිවලින් සකස් කර, ඇතුළට පැඩින් නමැති පුළුන් විශේෂය පුරවා සකස් කළ සෙල්ලම් බෝනික්කන් (ටෙඩි බෙයාර්) තිදෙනකු සිට ඇත. ඒ තුළ කිලෝ ග්‍රෑම් 10 යි ග්‍රෑම් 323 ක් බර කොකේන් මත්ද්‍රව්‍ය කරල් 500 ක් සඟවා ගෙන පැමිණ තිබුණි.
මෙය කටුනායක ගුවන් තොටුපොළ ඉතිහාසයේ විශාලතම මත්ද්‍රව්‍ය වැටලීම බව රේගු මත්ද්‍රව්‍ය පාලන අංශයේ උසස් නිලධාරියෙක් පැවසීය.
මෙසේ අත්අඩංගුවට ගත් මත්ද්‍රව්‍ය තොගය සහ තායිලන්ත ජාතික කාන්තාව මේ පිළිබඳ වැඩිදුර විමර්ශන කටයුතු සඳහා කටුනායක ගුවන් තොටුපොළ පොලිස් මත්ද්‍රව්‍ය කාර්යාංශයේ නිලධාරීන් වෙත භාර දීමට පියවර ගෙන තිබේ.
කටුනායක ටී.කේ.ජී.කපිල
