ආසාදිතයන් වාර්තා වන බව වෛද්‍ය පර්යේෂණ ආයතනය කියයි
මේ දිනවල ආසියානු කලාපයේ ශීඝ්‍රයෙන් පැතිරෙමින් පවතින කොවිඩ් (Covid) ප්‍රභේදය මෙරටින් හඳුනාගෙන ඇති බව බොරැල්ල වෛද්‍ය පර්යේෂණ ආයතනය පවසයි.
කොවිඩ් ඔමික්‍රෝන් වෛරසයට අදාළ අනුප්‍රභේදයක් වන එල්.එෆ්. පොයින්ට් සෙවන් සහ එක්ස්.එෆ්.ජී. යන අනුප්‍රභේද ආසාදිත රෝගීන් මෙරටින් වාර්තා වන බව බොරැල්ල වෛද්‍ය පර්යේෂණ ආයතනයේ ප්‍රකාශකයෙක් ‘දිවයින’ට ඊයේ (01දා) පැවැසීය.
දිවයින පුරා පිහිටි රෝහල් කීපයකින් ලබාගත් ජෛව සාම්පල් වෛද්‍ය පර්යේෂණ අයතනයට ලබාගෙන සිදුකරන ලද පර්යේෂණවලින් මේ බව තහවුරු වී ඇතැයි ද හෙතෙම කියා සිටියේය.
බොරැල්ල වෛද්‍ය පර්යේෂණ ආයතනයේ වෛරස රෝග පිළිබඳ විශේෂඥ වෛද්‍ය ජූඩ් ජයමහ, විශේෂඥ වෛද්‍ය ජානකී අබේනායක ඇතුළු කණ්ඩායමක් විසින් මෙම පර්යේෂණ සිදුකර තිබේ.
කෙසේ වෙතත් මෙම කොවිඩ් වෛරසය අනුප්‍රභේද සම්බන්ධයෙන් අනිසි බියක් මහජනතාව ඇති කරගත යුතු නොමැති බවද එම ප්‍රකාශකයා කීය.
එසේම ගර්භණී මව්වරුන්, වැඩිහිටියන් හා නිදන්ගත රෝගීන් මුඛ ආවරණ පැලඳීම, ජනතාව වැඩි වශයෙන් ගැවසෙන ස්ථානවල රැඳී නොසිටීම යන සෞඛ්‍ය පුරුදු අනුගමනය කිරීම ඉතා වැදගත් බවද හෙතෙම කියා සිටියේය.
අප මේ ගැන ශ්‍රී ජයවර්ධනපුර විශ්වවිද්‍යාලයේ අසාත්මිකතා ප්‍රතිශක්තවේද සෛල වෛද්‍ය විද්‍යා අධ්‍යයන අංශයේ මහාචාර්ය චන්දිම ජීවන්දර මහතාගෙන් විමසූ විට කියා සිටියේ, අදාළ පර්යේෂණය බොරැල්ල වෛද්‍ය පර්යේෂණ ආයතනය මගින් සිදුකර තිබෙන බවය.
කෙසේ වෙතත්, හැකි සෑම විටම ජනතාව සෞඛ්‍ය ආරක්ෂක ක්‍රම අනුගමනය කිරීම නුවණට හුරු බව මහාචාර්යවරයා කියා සිටියේය.
නව කොවිඩ් ප්‍රභේදය ගෝලීය වශයෙන් නැවත ඉහළ යමින් තිබෙන පසුබිමක මෙලෙස කටයුතු කිරීම වඩාත් සුදුසු බවද ඒ මහතා කීය.
නව ප්‍රභේදය ජනවාරි මාසයේදී මුල්වරට හඳුනා ගෙන ඇති බවත් ලෝක සෞඛ්‍ය සංවිධානයේ අධීක්ෂණ යටතේ මෙම ප්‍රභේදය පිළිබඳව අධ්‍යයනය කරමින් ඇති බවත් කියා සිටි ජීවන්දර මහතා මේ වනවිට මෙම නව ප්‍රභේදය රටවල් ගණනාවකින් හඳුනාගෙන ඇති බවත් කියා සිටියේය.
ප්‍රදීප් ප්‍රසන්න සමරකෝන් සහ චමින්ද සිල්වා
