ශ්‍රී ලංකා රේගුවට බරපතළ තීරු බදු වංචාවක් සිදු කළ බවට තොරතුරු අනාවරණය වූ කෝටිපති ව්‍යාපාරිකයකු බස්නාහිර උතුරු අපරාධ කොට්ඨාසයේ නිලධාරීන් විසින් පසුගිය 30 දා පෑලියගොඩ ප්‍රදේශයේ වැටලීමකදී අත්අඩංගුවට ගෙන ඇත.
යුරෝපයේ පදිංචි ද්විත්ව පුරවැසිභාවය හිමි ශ්‍රී ලාංකිකයන් තම නිවාඩු කාලයගත කිරීමට මව්බිමට පැමිණෙද්දී එරට ඔවුන් පාවිච්චි කළ සුඛෝපභෝගී මෝටර් රථ රේගු අවසරය මත මෙරටට රැගෙන විත් හිමිකරු නැවත විදෙස්ගත වෙද්දී ඇටෝර්නි බලපත්‍රයක් මගින් එම වාහනය පවරාගෙන කූට ලේඛන සකසා අධික මිලට විකිණීමේ ජාවාරමක නිරතවූ වැල්ලවත්ත ප්‍රදේශයේ පදිංචි 45 හැවිරිදි මෙම කෝටිපතියා මීට ඉහත ද මෙවැනිම වාහන ජාවාරම්වල නිරතව ඇතැයි පොලිස් විමර්ශනවලදී අනාවරණය වී තිබේ.
පොලිස් අත්අඩංගුවට ගත් සැකකරු 31දා කොළඹ අලුත්කඩේ අංක 5 අධිකරණයට ඉදිරිපත් කිරීමෙන් අනතුරුව රුපියල් ලක්ෂ පහක ශරීර ඇප මත මුදාහැර ඇත. සැකකරුට එරෙහිව ඇති චෝදනා ගොණු කරන ලෙස පොලිසියට නියෝග කළ මහෙස්ත්‍රාත්වරයා නඩුව මේ මස 18 දා යළි කැඳවීමට නියෝග කළේය.
ව්‍යාජ අංක තහඩු සහිත වාහනයක් ධාවනයට යොදවා ඇති බවට බස්නාහිර උතුර අපරාධ කොට්ඨාසයේ නිලධාරීන් වෙත ලද තොරතුරක් මත පසුගිය 30දා පෑලියගොඩදී අත්අඩංගුවට ගෙන ඇති රේන්ජ් රෝවර් වර්ගයේ වාහනයේ හිමිකරුගෙන් ප්‍රශ්න කිරීමේදී ඔහු සන්තකයේ තිබූ එවැනිම කූට ලේඛන සහිත මර්සඩීස් බෙන්ස් වර්ගයේ සුඛෝපභෝගී රථයක්ද පොලිසිය විසින් සොයාගෙන ඇත. මෙම සැකකරු මීට ඉහතදී ද මේ අන්දමින් රේගු ආඥා පනත උල්ලංඝනය කරමින් වංචනික ලෙස වාහන කීපයක් විකුණා ඇතැයි තොරතුරු හෙළි වී ඇත.
සැකකාර ව්‍යාපාරිකයාගේ බිරිඳ ද කෝටිපති ව්‍යාපාරිකයාද එංගලන්තයේ සහ ශ්‍රී ලංකාවේ ද්විත්ව පුරවැසියන් බව පොලිස් විමර්ශනවලදී අනාවරණය කරගෙන ඇත. ද්විත්ව පුරවැසිභාවය හිමි පුද්ගලයන් මෙරටට පැමිණෙද්දී රැගෙන එන වටිනා වාහන ඔවුන් නැවත විදේශගත වන විට සැකකරු විසින් තාවකාලික ඇටෝර්නි බලපත්‍රයක් මගින් පවරා ගෙන වසර දෙකක් පමණ ධාවනය කිරීමෙන් පසු එයට අඩු වටිනාකමක් ඉදිරිපත් කර තීරු බදු වංචාවක් කරමින් රේගුවට විශාල පාඩුවක් සිදුකර ඇතැයි පොලිස් විමර්ශනවලදී අනාවරණය වී ඇත. අත්අඩංගුවට ගත් රුපියල් කෝටි දහසයකට අධික වටිනාකමින් යුතු දැනට පොලිසිය භාරයේ ඇති රේන්ජ්රෝවර් රථය සහ මර්සඩීස් බෙන්ස් රථය අද (02දා) රේගුවට භාරදීමට නියමිත බව වැටලීම කළ නිලධාරියෙක් පැවසීය.
බස්නාහිර උතුරු අපරාධ කොට්ඨාසයේ අධ්‍යක්ෂ සහකාර පොලිස් අධිකාරී රොහාන් ඕළුගල මහතාගේ අධීක්ෂණය මත එම අපරාධ කොට්ඨාසයේ ස්ථානාධිපතිවරුන් වන ප්‍රධාන පොලිස් පරීක්ෂක පදුමසිරි, ප්‍රධාන පොලිස් පරීක්ෂක ලින්ටන් සිල්වා සහ ප්‍රධාන පොලිස් පරීක්ෂක දොළමුල්ල යන නිලධාරීන්ගේ සහභාගිත්වයෙන් උප පොලිස් පරීක්ෂක මධුශංක, පොලිස් කොස්තාපල්වරුන් වන (77930) ගයාන්, (76770) බුද්ධික, (98794) උදය කුමාර, පොලිස් සැරයන් රියැදුරු (36235) ගුණවර්ධන යන නිලධාරීන් එක්ව මෙම වැටලීම සිදුකර ඇත.
