’මාලිනී ගැන මේ මොහොතේ වැඩියෙන්ම සතුටු වන්නේ මමයි. ඒ වගේම මටත් වඩා වැඩි සතුටක් ලබන්න ඕනෑ ඇගේ මවයි. මාලිනීට මේ තත්ත්වයට එන්න මටත් වඩා සහයෝගයක් දැක්වූයේ ඇයයි. අද මාලිනී ගැන දෙමවුපියන් වශයෙන් අප දෙදෙනාම ලබන්නේ උපරිම සතුටක්. පුංචි කාලේ මං මාලිනී ගැන නොසිතූ පැත්තකටයි ඇය යොමුවුණේ. ඒ දවස්වල අත ගසන හැම වැඩක්ම නොපසුබටව හැකි ඉහළම අයුරින් කිරීමේ හැකියාවත් ආශාවත් මාලිනී ළඟ තිබුණා. සසර චේතනා චිත්‍රපටයෙන් නිෂ්පාදක අධ්‍යක්ෂවරියක් වශයෙන් දොරට වඩින මේ අවස්ථාවත් ඇගේ නිදහස් සිතුම් පැතුම්වල ක්‍රියාශීලි ප්‍රතිඵලයක් වශයෙන් මා දකිනවා.
මගේ දරුවන් එකොළොස් දෙනොගෙන් වෙනසක් දුටු දරුවෙක් මාලනී. පුංචි කාලෙත් ඇය නංගිලා, මල්ලිලා, අයියලා අතරේ කැපීපෙනුණා. ඇය ස්වභාවයෙන්ම දඟකාරයි. ඒ වගේම හිතුවක්කාරයි. ඒ දඟකාරකම තුළින් ඉදිරියට ගිය ගමනක සාර්ථක පියවරක් අද මට දකින්න පිළිවන්.
මාලිනීගේ හැම ජයග්‍රහණයකදීම මමත් ඇය හා අපිරිමිත සතුටක් ලැබුවා. ඇගේ දුක් වේදනාවලදී මමත් ඇය හා දුක් වුණා. සිංහල සිනමාවේ අග්‍රගණ්‍ය නිළිය ලෙස කිරුළු පලන් මාලිනී ගේ ජය, සතුට, දුක, පැරදුම හමුවේ නොසෙල් වී නොවෙනස්ව සිටි මා අද පියකු වශයෙන් ඇගේ සිනමා ජීවිතය ගැන ඉමහත් ප්‍රීතියක් ලබනවා.‘
සර්නේලිස් ෆොන්සේකා
(තාත්තා)
අපේ පවුලේ හැමදෙයක්ම ඉටු වුණේ ඇගේ මහන්සිය මතින් – මාලිනීගේ මව එදා කියූදේ
මාලිනී මගේ තුන් වැනි දරුවායි. ඇයට වැඩිමහල් අයියලා දෙන්නෙක් ඉන්නවා. මාලිනී පවුලේ වැඩිමලා කියලා බොහෝ අය හිතනවා. මාලිනී ළඟට සිටින්නේත් මල්ලිලා දෙදෙනෙක්. මේ නිසා පිරිමි සහෝදරයන් අතරට මැදි වෙලා ඉපැදුණු මාලිනීත් හැදුණේ හරියට කොල්ලෙක් වගේ. පාසලේදී දුව ඉගෙන ගන්න හරිම දක්ෂයි. ඒ දවස්වල එයාගේ ආශාව තිබුණේ වෛද්‍යවරියක් වෙන්නයි.
කුඩා අවධියේම දරුවකුගේ හැසිරීම්, ක්‍රියාවන් දිහා බැලුවාම ඒ දරුවාගේ අනාගතය, ඉරණම පිළිබඳව සොඳුරු සිතුවිලි පහළ වන්නේ මවකට මිස අන් කිසිවකුට නොවේ. මමත් මාලිනී තරුණ වියේ පළ කළ අදහස් මතින් ඇය කවරදා හරි මේ වගේ තත්ත්වයකට ඒවි කියලා හිතාගෙන හැම සහයෝගයක්ම දුන්නා.
මාලිනී මට පුතුන් දහසකටත් වඩා අගෙයි. අපේ පවුලේ හැමදෙයක්ම ඉටු වුණේ ඇගේ මහන්සිය මතින්. දෙමව්පියන්ගෙන් දරුවන්ට ඉටු විය යුතු යුතුකම් පවා ඉටු කළේ මාලිනීයි. මට ගෑනු දරුවන් දීග දෙන්න දේපළ, දෑවැද්ද ප්‍රශ්නයක් වුණා. ඒ අපේ ආර්ථිකය උසස් තත්ත්වයක නොවූ නිසයි. ඔවුන්ගේ කන කර ආභරණ පවා අරන් දුන්නේ මාලිනී. පිරිමි සහෝදරයන්ගේ මඟුල් තුලාවලට අවශ්‍ය වියදම් පවා ඇය මගේ අතට ගෙනත්දී තිබෙනවා. බොහෝ අය සිතන්නේ මාලිනී ෆොන්සේකා කියන්නේ වතුපිටි, යාන වාහන, විශාල ව්‍යාපාර තියෙන ධනවත් නිළියක් කියලයි. ඇත්තෙන්ම ඇය ඉතුරු කළ දෙයක් නැහැ, තමන්ගේ සහෝදර සහෝදරියන්ට කළා මිසක්. තවමත් මාලිනීට කියලා ගෙයක් දොරක්වත් හදාගෙන නැහැ.
මාලිනී රඟපෑ චරිතාංග අතරින් ‘සහනය’, ‘සුසී’, ‘බඹරු ඇවිත්’ හා ‘සිරිපාල සහ රන්මැණිකා’ චිත්‍රපටවල රඟපෑම්වලට මං වඩාත් කැමතියි.
සීලවතී ෆොන්සේකා
(අම්මා)
