සීනි කම්හල් වැහුණොත් ලක්‍ෂ ගාණක් අනාථයි – ඇතිමලේ දී උක් ගොවියෝ උද්ඝෝෂණයේ

රට සීනිවලට බදු සහන: අපේ සීනිවලට බදු

ආනයනික සීනිවලට බදු සහන ලබාදී දේශීය සීනිවලට බදු අයකිරීම නිසා මෙරට සීනි කර්මාන්ත ශාලා වැසීගොස් ලක්‍ෂයකට අධික පිරිසකගේ රැකියා අවදානමට ලක්වන බව කියමින් උක් ගොවියෝ පිරිසක් සියඹලාණ්ඩුව ඇතිමලේ නගරයේ දී ඊයේ (29දා) දැඩි විරෝධතාවක නිරත වූහ.

ආනයනික සීනි සඳහා සියයට 18 ක් වූ වැට් බද්ද සහ සියයට දෙකයි දශම පහක් වූ (2.5) සමාජ ආරක්‍ෂණ බද්ද අය නොකරන බවත් දේශීය සීනිවලට එම බදු දෙකම අයකරන නිසා මිල වැඩිවී ඇලෙවි කිරීමේ හැකියාව අවම වී ඇති බවත් ඔවුහු පවසති.

සෙවනගල පැල්වත්ත ඇතිමලේ සහ ගල්ඔය කර්මාන්ත ශාලාවල සේවකයන් 80,000 කට වඩා සිටින බවත් යැපෙන පවුල් සංඛ්‍යාව 1,63,000 කට අධික බවත් ඔවුහු පැවැසූහ. මෙම කර්මාන්ත ශාලාවලින් ජාතික ආර්ථිකයට රුපියල් බිලියන 28ක පමණ දායකත්වයක් සපයන බවද උද්ඝෝෂකයෝ කියා සිටියහ.

මෙම ආයතන මගින් එතනෝල් ද නිෂ්පාදනය කරන බවත් එයටද බදු අය කරන බවත් පවසන උක් ගොවියෝ පවතින දුෂ්කරතා හමුවේ මෙම ආයතන පවත්වා ගෙන යෑම තවදුරටත් අපහසු තත්ත්වයට පත් වෙමින් තිබෙන බවත් මෙම කර්මාන්ත ශාලා වැසී යෑමට පෙර දේශීය සීනිවලට බදු සහන දී ආනයනික සීනිවලට යම් විකල්පයක් සිදු කර දේශීය කර්මාන්ත රැක ගන්නා ලෙසත් රජයෙන් ඉල්ලා සිටියහ.

චමින්ද සිල්වා