හිටපු ජනපති විශ්‍රාම වැටුප ගැන දැනට තීරණයක් නෑ
හිටපු ජනාධිපතිවරුන්ට සහ ඔවුන්ගේ පවුල්වලට ලබාදී ඇති විශේෂ වරප්‍රසාද අහෝසි කිරීමට සහ පාර්ලිමේන්තු මන්ත්‍රීවරුන්ගේ විශ්‍රාම වැටුප අහෝසි කිරීමට හැකි වන පරිදි අදාළ පනත් පරිච්ඡින්න කර නව පනත් කෙටුම්පත් දෙකක් සකස් කිරීම සඳහා ඇමති මණ්ඩල අනුමැතිය ලැබී ඇත.
ඒ අනුව 1936 අංක 4 දරන ජනාධිපතිවරුන්ගේ හිමිකම් පනත සහ 1977 අංක 1 දරන පාර්ලිමේන්තු විශ්‍රාම වැටුප් පනත පරිච්ඡින්න කර නව පනත් දෙකක් සකස් කිරීමට නීති කෙටුම්පත් සම්පාදකට උපදෙස් දීමට ඇමැති මණ්ඩල අනුමැතිය ලැබී තිබේ.
හිටපු ජනාධිපතිවරුන්ට සහ ඔවුන්ගේ පවුල්වලට ලබාදී ඇති විශේෂ වරප්‍රසාද අහෝසි කිරීම සඳහා සහ පාර්ලිමේන්තු මන්ත්‍රීවරුන්ට වසර පහකට පසු ලබාදෙන විශ්‍රාම වැටුප අහෝසි කිරීම සඳහා ජනතාව විසින් රජයට ජනවරමක් ලබාදී ඇති බව ද ඇමැතිවරයා කියා සිටියේය.
ජනාධිපතිවරුන්ගේ විශ්‍රාම වැටුප් අහෝසි කිරීම සඳහා ආණ්ඩුක්‍රම ව්‍යවස්ථාවත් සංශෝධනය කරන්නේ ද යන්න විමසූ විට ඇමැතිවරයා ප්‍රකාශ කළේ ප්‍රථමයෙන් මේ පනත් දෙක හරහා අපි වරප්‍රසාද අහිමි කරමු යන්නයි.
මේ පනත් දෙකට අදාළ සියලු වරප්‍රසාද එම පනත් සම්මත වූ දා පටන් අහෝසි වන බව ද ඇමැතිවරයා කියා සිටියේය.
අධිකරණ සහ ජාතික ඒකබද්ධතා ඇමැතිවරයා ඉදිරිපත් කළ යෝජනාවකට අනුව මේ කැබිනට් තීරණය ගෙන තිබේ.
ශ්‍යාම් නුවන් ගනේවත්ත
