ආපු අය දැන්ම යන්න හදන්න එපා
ඊශ්‍රායලය සහ ඉරානය අතර යුද්ධයක් පැවතියද ඊශ්‍රායලයේ රැකියාවේ නියුතු කිසිදු ශ්‍රී ලාංකිකයකු යළි ලංකාවට පැමිණීමට මෙතෙක් ඉල්ලීම් කර නැතැයි විදේශ කටයුතු, විදේශ රැකියා සහ සංචාරක ඇමැති විජිත හේරත් මහතා පාර්ලිමේන්තුවේදී ඊයේ (19දා) පැවසීය.
වාචික පිළිතුරු අපේක්ෂාවෙන් විපක්ෂ මන්ත්‍රී රෝහණ බණ්ඩාර මහතා විසින් අසන ලද ප්‍රශ්නයක අතුරු ප්‍රශ්නයකට පිළිතුරු දෙමින් ඇමැතිවරයා මේ බව කියා සිටියේය. එහිදී ඊශ්‍රායලයේ සිටින ශ්‍රී ලාංකිකයන්ගේ ආරක්ෂාව සම්බන්ධයෙන් මන්ත්‍රීවරයා ඇසූ ප්‍රශ්නයකට ඇමැතිවරයා මෙසේ පිළිතුරු දුන්නේය.
“ඊශ්‍රායලය සහ ඉරානය අතර යුද්ධය නිසා ශ්‍රී ලාංකිකයන් යම් පීඩාවකට පත්ව සිටිනවා. ඉරානයේ ශ්‍රී ලාංකිකයන් 35ක් පමණ ප්‍රමාණයකුත් ඊශ්‍රායලයේ විසිදහසක පමණ පිරිසකුත් සිටිනවා. ඊශ්‍රායලයේ සියලුම ගුවන්තොටුපළවල් මේ වන විට වසා දමා තිබෙනවා. යුද්ධයෙන් පසුගිය දිනවල ශ්‍රී ලාංකිකයන් 04 දෙනකු තුවාල ලබා තිබෙනවා. ඉන් තිදෙනකුගේ තත්ත්වය බරපතළ නෑ. එක් අයකුගේ කකුලකට වීදුරුවක් කඩා වැටිලා යම් බරපතළ තත්ත්වයකට පත්ව සිටිනවා. අවශ්‍ය කෑම බීම, ඉඳුම් හිටුම් ප්‍රතිකාර ලබා දීමට අපේ තානාපති කාර්යාලය පැය 24 පුරාම මැදිහත් වී කටයුතු කරනවා. අපේ විදේශ කටයුතු අමාත්‍යාංශය නිරන්තරයෙන් මේ ගැන අවධානය යොමු කරනවා.
ඊශ්‍රායලයේ සේවයේ නියුතු අයකුගේ පුත්‍රයෙක් මෙරටදී මියගොස් තිබුණා. ඒ පියාව වෙනත් රටකට මාර්ගයකින් ගෙන ගොස් මෙරටට පැමිණීමට අපේ තානාපති කාර්යාලය මැදිහත්වී පහසුකම් ලබා දුන්නා. ජෝර්දානයට ගෙන ගොස් එතනින් අම්මාන් නගරයට පැමිණ ගුවන් යානයකින් පැමිණිය හැකියි. ව්‍යාපාර කටයුතු සඳහා ගිය දෙදෙනකු නැවත පැමිණීමට ඉල්ලීම් කර තිබුණා. ඒ දෙදෙනාටත් ඉක්මනින් පැමිණීමට පහසුකම් සලසන්න පුළුවන්.
ඊශ්‍රායලයේ ජීවත්වන අනෙකුත් ශ්‍රී ලාංකිකයන් ලංකාවට එන්න ඕනෑ කියන්නේ නෑ. ඒ අය එහේ තිබෙන ආරක්ෂක විධි පාවිච්චි කරමින් ජීවත් වෙනවා. ඊශ්‍රායල ආරක්ෂක අමාත්‍යාංශය ඒ පිළිබඳ දැනුවත් කිරීම් කරනවා.
යුද්ධයේ ඉතා තීව්‍ර තත්ත්වයකට පත්වුවහොත් ආසන්න රටවල දේශසීමාවලට ගුවන් යානා යවා ශ්‍රී ලාංකිකයන් ගෙන්වා ගන්නවා. ඕනෑම අවස්ථාවක ශ්‍රී ලාංකිකයන් ගෙන්වා ගන්න අප සූදානමින් ඉන්නවා.
නිවාඩු ඇවිත් සිටින අයට අපි කියන්නේ නැවත ඊශ්‍රායලයට යන්න හදිස්සි වෙන්න එපා. යුද්ධය අවසන් වූ පසුව යන්න පුළුවන්. ඒ සඳහා වීසා කාලය දීර්ඝ කරන්න අපි මැදිහත් වෙනවා. ඊශ්‍රායලයේ කිසිම රාජ්‍ය ආයතනයක් වැඩ කරන්නේ නෑ. ඒ ගැන මැදිහත් වන පීබා ආයතනය මේ සම්බන්ධයෙන් පියවර ගන්නවා කියා දැනුම් දී තිබෙනවා.”
අකිත පෙරේරා, රනිල් ධර්මසේන
