ඔස්ට්‍රියාවේ තෙදිනක ශෝක කාලයක්
ඔස්ට්‍රියාවේ දෙවැනි විශාලතම නගරය සේ සැලකෙන ‘ග්‍රාස් ’ නගරයේ පිහිටි උසස් පාසලකට පෙරේදා (10) උදෑසන කඩා වැදුණු පුද්ගලයෙකු විසින් සිදු කළ වෙඩි තැබීමකින් වෙඩික්කරු ඇතුළු සිසුන් හා වැඩිහිටියන් 11 දෙනෙකු මියගොස් ඇති අතර තවත් 30දෙනෙකු පමණ තුවාල ලබා රෝහල්ගත කර තිබේ. මුළු මහත් ඔස්ට්‍රියාවම දැඩි කම්පනයටත්, ශෝකයටත් පත් කර ඇති මෙම වෙඩිතැබිම සිදු කළ අදාළ පාසලේ ආදී සිසුවෙකු වූ 21 හැවිරිදි වෙඩික්කරු තමන් උගත් පාසලේ සිවුදෙසටම වෙඩි තබා මිනිස් ඝාතනයන් සිදු කිරීමෙන් අනතුරුව පාසලේ වැසිකිළියක් තුළදී ඔහුටම වෙඩි තබා ගනිමින් සිය දිවි හානි කරගෙන තිබේ. මූලික පොලිස් විමර්ශනයන්ට අනුව ඝාතකයා වෙඩි තැබීම සිදු වූ පාසලේ ආදී සිසුවෙකු වුවද ඔහු සිය අධ්‍යාපනය සම්පූර්ණ කර නොමැති බව වාර්තා වේ.
මෙම සිදුවීමෙන් මියගොස් ඇති 11 දෙනාගෙන් 7 දෙනෙකු කාන්තාවන් බව ඔස්ටි්‍රයානු රජය විසින් නිවේදනය කර තිබේ. මේ වනවිට වෙඩි තැබීමෙන් තුවාල ලබා රෝහල්ගත කර ඇති 30 දෙනාගෙන් ඇතැමෙකු ආසාධ්‍ය තත්ත්වයේ පසුවන බව අනාවරණය වී තිබේ. වෙඩි තැබීම සිදු වූ ඔස්ට්‍රියාවේ දෙවැනි විශාලතම නගරය මෙන්ම දෙවැනි විශාලතම ජනගහනය සිටින ග්‍රාස් නගරය යුරෝපයේ සංස්කෘතික අගනුවර ලෙසද හැඳින්වේ. මෙම වෙඩි තැබීම මෑත කාලයේ ඔස්ට්‍රියාවේ සිදු වූ දරුණුම වෙඩි තැබීමේ සිදුවීම ලෙස සැලකෙන අතර ඉන් මියගිය පිරිස වෙනුවෙන් රට පුරා තෙදින ජාතික ශෝක දිනයක් ප්‍රකාශයට පත් කිරීමට ඔස්ට්‍රියානු රජය විසින් පියවර ගෙන තිබේ. මෙම වෙඩි තැබීම සිදු කිරීමට මුල් වූ හේතුව අනාවරණය වී නොමැති අතර සිදුවීම සම්බන්ධයෙන් බලධාරීන් විසින් විශේෂ විමර්ශනයක් දියත් කර තිබේ. මේ අතර ඔස්ට්‍රියානු පොලිසියට අනුව මෙම වෙඩි තැබීම සඳහා සැකකරු විසින් නිත්‍යානුකූලව ලබාගත් ගිනි අවි දෙකක් භාවිත කර තිබේ. මේ අතර මෙම සිදුවීමෙන් මියගිය පිරිස සිහි පත් කරමින් ග්‍රාස් නගරයේ චතුරඝ්‍රයට රැස් වූ සිය දහස් ගණනක් වන ඔස්ට්‍රියානු ජාතිකයන් විසින් පියවර ගෙන තිබේ.
