මැද පෙළින් පන්දුවට පහරදීම සඳහා පිටියට පිවිසි සමීර් රිස්වි ගේ විශිෂ්ට පිතිහරඹයත්, මුෂ්ටෆිසූර් රහ්මන්ගේ කැපී පෙණෙන පන්දු යැවීමත් හේතුවෙන් ඉන්දීය ප්‍රිමියර් ලීග් 2025 තරගාවලියේ 66වන තරගය වූ දිල්ලි කැපිටල්ස් කණ්ඩායම සහ පන්ජාබ් කිංස්ග් කණ්ඩායම අතර තරගයෙන් කඩුලු 6ක ජයක් ලැබීමට දිල්ලි කැපිටල්ස් කණ්ඩායම සමත්විය.
පෙරේදා (24දා) ජයිපූර් හිදී පැවැති මෙම තරගයේ පළමුව පන්දුවට පහරදුන් පන්ජාබ් කිංග්ස් කණ්ඩායම නියමිත පන්දු වාර 20 අවසානයේ කඩුලු 8ක් දැවී ලකුණු 206ක් ලබාගනිමින් ලකුණු 207ක අභියෝගයක් ප්‍රතිවාදීන්ට එල්ල කළද, පිළිතුරු ඉනිම ක්‍රීඩා කිරීම සඳහා පිටියට පිවිසි දිල්ලි කැපිටල්ස් කණ්ඩායම පන්දු වාර 19යි පන්දු 3ක් අවසානයේ කඩුලු 4ක් පමණක් දැවී ලකුණු 208ක් ලබාගනිමින් තරගයේ ජය වාර්තා කළේය.
පන්ජාබ් කණ්ඩායම වෙනුවෙන් පන්දුවට පහරදීමේදී ෂෙයාර්ෂ් අයියර් ලකුණු 53ක්, මාකර්ස් ස්ටොයිනස් නොදැවී ලකුණු 44ක්, ජොස් ඉංග්ලිෂ් ලකුණු 32ක් සහ ප්‍රභාෂිමරන් සිංග් ලකුණු 28ක් ලැබීය.
පන්දු යැවීමේදී මුස්ටෆිසූර් රහ්මාන් ලකුණු 33කට කඩුලු 3ක්, විප්රාජ් නිගම් ලකුණු 38කට කඩුලු 2ක් සහ කුල්දීප් යාදෙව් ලකුණු 39කට කඩුලු 2ක් දවාලීය.
දිල්ලි කැපිටල්ස් කණ්ඩායම වෙනුවෙන් පන්දුවට පහරදීමේදී විශිෂ්ට ඉනිමක් දියත් කළ සමීර් රිස්වි පන්දු 25කට පමණක් මුහුණදෙමින් හයේ පහර 5ක් සහ හතරේ පහර 3ක් සමගින් නොදැවී ලකුණු 58ක් ලබාගැනීමට සමත්වූ අතර, ඊට අමතරව කරුන් නයිර් ලකුණු 44ක් සහ කේ. එල්. රාහුල් ලකුණු 35ක් ලැබීය. පන්දු යැවීමේදී හර්ප්‍රීට් බ්‍රාර් ලකුණු 41කට කඩුලු 2ක් බිඳහෙළීය.
තරගයේ වීරයා ලෙස සමීර් රිස්වි සම්මාන ලැබීය.
සිසිර ඉන්ද්‍රජිත්
