අන්තර්ජාලය ඔස්සේ විවිධ සේවා සපයමින් උපයන ආදායම්වලට සියයට 18ක එකතු කළ බදු (වැට්) අය කිරීම 2025 ඔක්තෝබර් 01 වැනිදා සිට ක්‍රියාත්මක වේ.
මේ අනුව දේශීය ආදායම් දෙපාර්තමේන්තුව නිවේදනය කර ඇත්තේ නිර්වාසික තැනැත්තකු විසින් ශ්‍රී ලංකාවේ තැනැත්තෙකු වෙත ඉලෙක්ට්‍රොනික් වේදිකාවක් හරහා සපයනු ලබන සේවා සඳහා මෙම බද්ද ඔක්තෝබර් 01 දින සිට අදාළ වන බවයි.
මෙම බද්ද සඳහා ලියාපදිංචි වීම, ගෙවීම් කිරීම සහ අනුකූලතාව දැක්වීම පිළිබඳ කාර්යපටිපාටිය දේශීය ආදායම් කොමසාරිස් ජනරාල්වරයා විසින් නිශ්චිතව දක්වනු ලබන අතර ‘ඉලෙක්ට්‍රොනික වේදිකාව, ස්ථීර ස්ථානය සහ නිර්වාසික තැනැත්තා’ යන එකතු කළ බදු පනතේ නිර්වචනය කර ඇති බව දේශීය ආදායම් දෙපාර්තමේන්තුව පවසයි.
මෙයට අදාළ ගැසට් නිවේදනය දේශීය ආදායම් කොමසාරිස් ජනරාල්වරිය විසින් ඉකුත් ජූලි 01 දින නිකුත් කරන ලදී.
ශ්‍යාම් නුවන් ගනේවත්ත
