ජපානය විසින් ලබන සතියේ ලබා දී ඇති අවසන් දිනයට පෙර එක්සත් ජනපදය සමග ගිවිසුමකට නොඑළඹුනහොත් එරටින් ආනයනය කරන භාණ්ඩ මත සියයට 30 සිට සියයට 35ක් දක්වා වූ තීරුබද්දක් පනවන බවට ඇමෙරිකානු ජනාධිපති ඩොනල්ඩ් ට්‍රම්ප් විසින් තර්ජනය කර තිබේ. මෙය ඉකුත් අප්‍රේල් 02 වැනිදා ජනාධිපති ට්‍රම්ප් විසින් ජපානයෙන් ආනයනය කරන භාණ්ඩ සඳහා පනවන බවට නිවේදනය කර ඇති සියයට 24ක තීරුබද්දට වඩා ඉහළ වූ තීරු බද්දකි.
කෙසේ වුවද ඉකුත් අප්‍රේල් මස 02 වැනිදා ජනාධිපති ට්‍රම්ප් විසින් ජපානය ඇතුළු ඇමරිකා එක්සත් ජනපදයේ වෙළෙඳ හවුල්කරුවන් බොහෝ දෙනකුගෙන් ආනයනය කරන භාණ්ඩ මත පනවා තිබූ සියයට 24ක තීරු බද්ද දින 90ක කාලසීමාවක් සඳහා සියයට 10ක් දක්වා අඩු කර තිබූ අතර අදාළ කාලසීමාවේදී එම රටවල් ඇමරිකාව සමග සාකච්ඡා කර
ගිවිසුමකට එළඹීමට අවස්ථාව ලබා දීම එහි අරමුණ වී තිබිණි. මේ අනුව ජපානය ඇතුළු ඇමරිකාවේ වෙළඳ හවුල්කරුවන් සඳහා
ගිවිසුමකට එළඹීමට ලබා දී තිබූ කාලය මෙම මස 09 වැනිදා අවසන් වන අතර එය තවදුරටත් දීර්ඝ නොකරන බව ඇමරිකානු ජනාධිපතිවරයා පවසා තිබේ. මේ අතර ජපන් රජය ට්‍රම්ප් ජනාධිපතිවරයාගේ තීරුබදු වැඩිකිරීමේ තර්ජනය සම්බන්ධයෙන් ප්‍රතිචාර දැක්වීම ප්‍රතික්ෂේප කර තිබේ.
