ඇමරිකා එක්සත් ජනපදය විසින් සපයන විදේශීය මානුෂීය ආධාර බොහොමයක් කපා දැමීමට ඇමරිකානු ජනාධිපති ඩොනල්ඩ් ට්‍රම්ප් විසින් ගෙන ඇති පියවර හේතුවෙන් වසර 2030 වන විට ලොව පුරා රටවලින් අමතර මරණ මිලියන 14කට අධික සංඛ්‍යාවක් වාර්තා වනු ඇතැයි එංගලන්තයේ පළ වන ලැන්සෙට් වෛද්‍ය සඟරාවේ පළකර ඇති නවතම පර්යේෂණ වාර්තාවක සඳහන් කර තිබේ. මෙම මරණවලින් තුනෙන් එකක්ම කාන්තාවන් හා ළමුන් වන බව එම වාර්තාවේ දැක්වේ.
ජනාධිපති ඩොනල්ඩ් ට්‍රම්ප් විසින් ජාත්‍යන්තර සංවර්ධනය සඳහා වන ඇමරිකානු ඒජන්සිය හෙවත් යූ එස් ඒඩ් ආයතනය හරහා අරමුදල් සැපයූ ගෝලීය ආධාර වැඩසටහන්වලින් සියයට 80කට වැඩි සංඛ්‍යාවක් අවලංගු කිරීමට පියවර ගෙන තිබීම මෙම තත්ත්වයට හේතු වී තිබේ. අදාළ පර්යේෂණයේ සම කර්තෘවරයා වන ඩේවිඩේ රසේල්ලාට අනුව ට්‍රම්ප් රජය විසින් යූ එස් ඒඩ් ආයතනය හරහා ක්‍රියාත්මක වූ ආධාර වැඩසටහන් අවලංගු කිරීම මගින් අඩු හා මධ්‍යම ආදායම්ලාභී රටවල් බොහොමයකට ගෙන දී ඇති කම්පනය ගෝලීය වසංගතයක් හෝ ප්‍රධාන පෙළේ යුද ගැටුමකින් හටගන්නා කම්පනය හා සමාන වුවකි. මෙම ආධාර කපා හැරීම මගින් පසුගිය දශක දෙකක කාලයේදී අවදානමකට ලක්වන ජනකොටස්වල සෞඛ්‍ය සංවර්ධනය සම්බන්ධයෙන් අත්කරගත් ප්‍රගතිය නතර කිරීමට හෝ ආපස්සට හැරවීමට හේතුවන බවද රසේල්ලා සඳහන් කර තිබේ. ලැන්සෙට් වෛද්‍ය සඟරාවේ පළ කර ඇති පරයේෂණ වාර්තාවට අනුව යූ එස් ඒඩ් ආයතනයේ අරමුදල් හරහා ලොව පුරා රටවල් 133ක ක්‍රියාත්මක වූ වැඩසටහන් හේතුවෙන් 2001 සිට 2021 දක්වා වූ වසර 20ක කාලයේදී සංවර්ධනය වෙමින් පවතින රටවල මරණ මිලියන 91ක් වළක්වා ගැනීමට හැකිව තිබේ. මේ අතර මෙම සතියේදී ලොව විශාලතම ආධාර සමුළුව එක්සත් ජාතීන්ගේ සංවිධානයේ ප්‍රධානත්වයෙන් ස්පාඤ්ඤ සෙවිල් නගරයේදී පැවැත්වීමට නියමිතව ඇති බව විදෙස් මාධ්‍ය පවසයි.
