උපදේශකයින් අතර එකඟතාවක් නැතත් ඉරානයේ භූගත න්‍යෂ්ටික මධ්‍යස්ථාන වනසන ඊශ්‍රායල ප්‍රහාරවලට එක්වීමට ට්‍රම්ප් සූදානම්
‘කොන්දේසි විරහිතව යටත් වන්න’- ට්‍රම්ප් ඉරානයට කියයි
‘සියොන්වාදීන්ට කිසිදු අනුකම්පාවක් නැහැ’ – ඉරාන උත්තරීතර නායකයාගෙන් එක්ස් සටහනක්
ඊශ්‍රායල ප්‍රහාරවලින් ඉරාන වැසියෝ 224ක් මරුට: 188 කට තුවාල
ඉරානයේ න්‍යෂ්ටික අවි විනාශ කරන්නට අමෙරිකාව සතු බලගතු අවි….
ඇමෙරිකානු ප්‍රහාරක හමුදා ජෙට් යානා 30ක් යුරෝපයට යවා ඇති අතර ඉරානයට එරෙහි මෙහෙයුම් සඳහා ඇමරිකානු මැදිහත්වීමක් සිදුවනු ඇති බවට වාර්තා පළවී තිබේ. ඉරානයේ භූගත න්‍යෂ්ටික මධ්‍යස්ථාන ඉලක්ක කරගත් ඊශ්‍රායල ප්‍රහාරවලට එක්වීමට ජනපති ඩොනල්ඩ් ට්‍රම්ප් සලකා බලමින් සිටින බව සීබීඑස් ප්‍රවෘත්ති සේවය වාර්තා කර තිබේ.
ඇමරිකාවට පහර දිය හැකි එක් ඉලක්කයක් වන්නේ ඉරානයේ ෆෝර්ඩෝ න්‍යෂ්ටික බලාගාරයයි. එය භූගත ගැඹුරු පරිශ්‍රයක පිහිටා ඇති අතර එය විනාශ කළ හැකි රාත්තල් 30,000 ක බෝම්බයක් ඇත්තේ ඇමෙරිකානුවන් සතුව පමණකි. එහෙත් ඉරානයට පහර දීමට එක්වීම සම්බන්ධයෙන් ට්‍රම්ප්ගේ උපදේශකයින් අතර පැහැදිලි එකඟතාවක් නැත. යුද විශේෂඥයින් පවසන්නේ ඇමෙරිකාව මීට සම්බන්ධ වීම මගින් ගැටුම ‘සම්පූර්ණයෙන්ම’ වෙනසකට ලක්වනු ඇති බවයි.
ප්‍රහාරක ජෙට් යානා සහ බෝම්බ හෙළන ගුවන් යානාවලට ඉන්ධන පිරවීම සඳහා භාවිත කරන ඇමෙරිකානු හමුදාවට අයත් ටැංකි ගුවන් යානා ඇතුළු යානා 30 ක් පසුගිය දින තුන තුළ යුරෝපයට යවා තිබේ. මේ යානා ස්පාඤ්ඤය, ස්කොට්ලන්තය සහ එංගලන්තයේ ඇති ඇමෙරිකානු ගුවන් කඳවුරුවල නතර කර තිබේ.
ඇමරිකානු ජනපති ඩොනල්ඩ් ට්‍රම්ප් ඉරානයෙන් ‘කොන්දේසි විරහිතව යටත් වන’ ලෙස ඉල්ලා සිටින අතර මේ අවස්ථාවේ ඉරාන ආධ්‍යාත්මික නායක අයතුල්ලා කමේනි මරා නොදමන බව ද පවසයි. එහෙත් ඉරාන උත්තරීතර නායක අයතුල්ලා අල් කමේනි එක්ස් හි සටහන් තබමින් ‘කිසි විටෙකත් සියොන්වාදීන් සමග සම්මුතියක් ඇති කර නොගන්නා’ බව පවසා තිබේ.
“අපි සියොන්වාදීන්ට කිසිදු අනුකම්පාවක් නැහැ” යනුවෙන් ඔහු තැබූ සටහනේ පරිවර්තනයක දැක්වේ. තවත් සටහනක ඔහු ‘සටන ආරම්භ වනවා’ යනුවෙන් දක්වා ඇත.
ඊයේ එනම් හයවන දිනටත් ඉරානය සහ ඊශ්‍රායලය අතර මිසයිල හුවමාරු වෙමින් තිබිණි. ඉරානය ඊශ්‍රායලයේ ටෙල් අවිව් වෙත ෆෙටා-1 ‘හයිපර්සොනික්’ මිසයිලයක් එල්ල කර තිබේ.
ඉරානයට එල්ල කළ ඊශ්‍රායල ප්‍රහාරවලින් සිවිල් වැසියන් 224 දෙනකු මියගොස් 188 දෙනකු තුවාල ලබා තිබේ. තවත් ප්‍රහාර එල්ල වේ යැයි බියෙන් විශාල පිරිසක් ටෙහෙරානයෙන් පලා යමින් සිටිති. ඉරානයේ න්‍යෂ්ටික වැඩසටහනට එරෙහිව සතියක් හෝ දෙකක් ඇතුළත තම අරමුණු සාක්ෂාත් කර ගැනීමට හැකිවනු ඇතැයි ඊශ්‍රායල ආරක්ෂක හමුදා නිලධාරීන් වාර්තාකරුවන්ට පවසා තිබේ.
චතුර පමුණුව
