අනුන්ගේ රාජකාරියක් පොලිසිය කිරීමෙන් විත්තියට අගතියක් වෙලා
වහාම විමර්ශනයක් කිරීමට නියෝග
අධිකරණය විසින් පිස්කල්වරයා මගින් විත්තියට භාරදීමට නියෝග කළ වාරණ නියෝගයක් සහ අතුරු තහනම් දැන්වීම් නියෝගයක් පිස්කල්වරයා වෙනුවට පොලිසිය විසින් ම ගෙන ගොස් විත්තියට භාරදීම සම්බන්ධයෙන් වහාම විමර්ශනයක් සිදුකරන ලෙස කෑගල්ල දිසා විනිසුරු ඩී. එම්. රුවන් ධම්මික මහතා අධිකරණ ලේඛකාධිකාරිවරයාට නියෝග කළේය.
එකී නියෝග පිස්කල් මගින් භාරදී ඇති බවට කාර්ය සටහන් අනුව පෙනී යන නමුත් සැබැවින්ම එකී නියෝග විත්තියට භාරදී ඇත්තේ පොලිසිය විසින් බවත් එය සිතාසි භාරදීමේ අධිකරණ කාර්ය පටිපාටියට පටහැනි ක්‍රියාවක් මෙන්ම පොලිසිය නීතිය අතට ගෙන අධිකරණය පහළ තත්ත්වයකට ඇද දැමීමක් බවත් පෙන්වා දෙමින් විත්තිය වෙනුවෙන් පෙනී සිටි ජ්‍යෙෂ්ඨ නීතිඥ ඉයන් ප්‍රනාන්දු මහතා කළ කරුණු දැක්වීම් සලකා බැලූ විනිසුරුවරයා එම නියෝගය කළේය.
අනුන් වෙත පැවැරී ඇති රාජකාරියක් සියතට ගෙන පොලිසිය කටයුතු කිරීමෙන් විත්තියට බලවත් අගතියක් සිදුකර ඇති බවද විත්තියේ නීතිඥවරයා අධිකරණයට පෙන්වා දුන් අතර එහි ගැටලු සහගත තත්ත්වයක් පවතින බව විනිසුරුවරයා ද පිළිගෙන තිබිණි. අලි ඇතුන්ගේ මළ අපද්‍රව්‍ය මගින් කඩදාසි නිෂ්පාදනය කරන සමාගමකට එරෙහිව ඉදිරිපත් කළ පැමිණිල්ලක් සලකා බැලූ දිසා විනිසුරුවරයා එම වාරණය නිකුත් කොට තිබිණි. ඩෙරික් ප්‍රනාන්දු නීතිඥ සමාගමේ උපදෙස් මත නීතිඥ ලක්ෂිත කුමාරසිංහ සහ නීතිඥ රොෂනාරා ප්‍රනාන්දු සමග ජ්‍යෙෂ්ඨ නීතිඥ ඉයන් ප්‍රනාන්දු මහතා පෙනී සිටියේය.
ඒ. ජේ. ඒ. අබේනායක
