පෞද්ගලික සරසවි සිසුන් 10ක් ද සාදයට ඇවිත්
අළුබෝමුල්ල, මහබෙල්ලන, ගුන්නවත්ත ප්‍රදේශයේ අධි සංගීතය ද යොදාගෙන පවත්වාගෙන යමින් තිබූ ෆේස්බුක් මත්ද්‍රව්‍ය සාදයක් වටලා ගංජා සහ හෑෂ් සමග පෞද්ගලික විශ්වවිද්‍යාල සිසුන් ඇතුළු තරුණයන් 26 දෙනකු පෙරේදා (14 දා) අලුයම අත්අඩංගුවට ගත් බව අළුබෝමුල්ල පොලිසිය පවසයි.
119 පොලිස් හදිසි ඇමතුම් අංශයට ලද තොරතුරකට අනුව අළුබෝමුල්ල පොලිසියේ ස්ථානාධිපති පොලිස් පරීක්ෂක සංජීව ලක්මාල් මහතා ඇතුළු නිලධාරීන් කණ්ඩායමක් විසින් එම ස්ථානය වටලා මොවුන් කොටුකරගෙන තිබේ.
මෙහිදී අත්අඩංගුවට ගත් පිරිස අතර ගංජා සහ හෑෂ් ළඟ තබාගෙන සිටි තරුණයන් 16 දෙනකු ද සිය අනන්‍යතාව තහවුරු කිරීමට නොහැකි වූ තරුණයන් 10 දෙනකු ද සිටින බව ද පොලිසිය පවසයි.
ෆේස්බුක් සමාජ මාධ්‍ය ඔස්සේ සංවිධානය කර තිබූ මෙම ෆේස්බුක් සාදය සඳහා සහභාගි වී ඇත්තේ බණ්ඩාරගම, පොකුණුවිට, මිල්ලනිය, හල්තොට, ඉංගිරිය හා පරගස්තොට යන ප්‍රදේශවල පදිංචි අවුරුදු 20ත් 28ත් අතර වයසේ පසුවන අය බව පොලිසිය කියයි.
අත්අඩංගුවට ගත් පිරිස අතර පෞද්ගලික විශ්වවිද්‍යාලයක සිසුන් 10 දෙනකු සිටින බව ද පොලිසිය පවසයි.
අළුබෝමුල්ල පොලිසියේ ස්ථානාධිපති පොලිස් පරීක්ෂක සංජීව ලක්මාල් මහතාගේ උපදෙස් මත උප පොලිස් පරීක්ෂක චානක, පොලිස් කොස්තාපල්වරුන් වන ඒකනායක (29383), තාරක (23013), වසන්ත (95633), බණ්ඩාර (100052), විශ්ව (106605), හර්ෂණ (106606), කුමාර (100047), රසාංජන (102122), කාන්තා පොලිස් කොස්තාපල් ඩයස් (13172) යන නිලධාරීහු මෙම වැටලීම සඳහා සහභාගි වූහ.
ප්‍රදීප් ප්‍රසන්න සමරකෝන්
