අන්තර් පාසල් රග්බි ලීග් ශූරතාවලිය
ශ්‍රී ලංකා පාසල් රග්බි පාපන්දු සංගමය විසින් සංවිධානය කර ඇති අන්තර් පාසල් ලීග් ශුරතා වයස අවුරුදු 19 න් පහළ ප්‍රමුඛ පෙළ බාලක රග්බි පාපන්දු තරගාවලියේ දෙවන සතියේ තරග සෙනසුරාදා (14දා) සහ ඉරිදා (15) පැවැත්වේ.
මෙහි තරග 07 ක් සෙනසුරාදා දිනයේදී ද තරග 02 ක් ඉරිදා දිනයේදී ද ක්‍රියාත්මක කෙරේ.
“ඩයලොග්” ආසියාටා සමාගමේ අනුග්‍රාහක ශක්තියෙන් බලගැන්වෙන මෙවර ප්‍රමුඛ පෙළ පාසල් ලීග් ශූරතාවලියට එක්ව සිටින පාසල් සංඛ්‍යාව 18 කි.
මෙවර තරගාවලිය ආරම්භ කරමින් ඉකුත් සතියේ පැවති තරග ආශ්‍රිතව ජයග්‍රහණ අත්පත් කර ගැනීමට බම්බලපිටිය ශාන්ත පීතර, කොළඹ ඉසිපතන, කොළඹ රාජකීය, කොළඹ ඩී. එස්. සේනානායක, ගල්කිස්ස සාන්ත තෝමස්, මහනුවර ත්‍රිත්ව, කොළඹ වෙස්ලි සහ කොළඹ සහිරා යන විදුහල් සමත් වීම කැපී පෙනුණි. ආරම්භයේ සිට අවසානය දක්වාම තියුණු මුහුණුවරකට අනුවර්තනය වී තිබුණු මහනුවර විද්‍යාර්ථ විදුහල සහ කොළඹ ශාන්ත ජෝශප් විදුහල අතර තරගය ලකුණු 24 – 24 ක් ලෙස ජය පරාජයෙන් තොරව නිමාවට පත් විය.
තර්ස්ටන් විදුහලට එරෙහිව රාජකීය විදුහල ලත් ලකුණු 74 – 15 ක ජයග්‍රහණය විශාලතම ලකුණු පරතරය සහිත ජයග්‍රහණය ලෙස සටහන්වූ අතර මහනුවර කිංග්ස්වුඩ් විදුහලට එරෙහිව ගල්කිස්ස සාන්ත තෝමස් විදුහල ලත් ලකුණු 29 – 28 ජයග්‍රහණය අතිශයින්ම සියුම් විය.
මේ සතියේ තරග සැළසුම
(සෙනසුරාදා 14 දින)
● මහනුවර ත්‍රිත්ව සහ මහනුවර විද්‍යාර්ථ අතර පල්ලෙකැලේ දී
● මහනුවර ශාන්ත අන්තෝනි සහ බම්බලපිටිය ශාන්ත පීතර අතර නිත්තවෙල දී
● කොළඹ රාජකීය සහ මහනුවර ශ්‍රී සුමංගල අතර මහනුවර බෝගම්බර දී
● කොළඹ සහිරා සහ ගල්කිස්ස සාන්ත තෝමස් අතර ගල්කිස්සේ දී
● ගල්කිස්ස විද්‍යා සහ කොළඹ ආනන්ද අතර ආනන්ද පිටියේ දී
● කොළඹ ශාන්ත ජෝසප් සහ කොළඹ තර්ස්ටන් අතර ලොන්ඩන් පෙදෙසේ දී
● කොළඹ මහනාම සහ මහනුවර ධර්මරාජ අතර රත්මලානේ දී
ඉරිදා (15 දින)
● කොළඹ ඩී. එස්. සේනායක සහ කොළඹ වෙස්ලි අතර ලොඩන් පෙදෙසේ දී
● කොළඹ ඉසිපතන සහ මහනුවර කිංග්ස්වුඩ් අතර බෝගම්බර දී
අනුරුද්ධ හේරත් බණ්ඩාර
