හලාවත ආනන්ද විද්‍යාලය සහ මීගමුව හරිස්චන්ද්‍ර විද්‍යාලය අතර ප්‍රථම වරට පවත්වන “බටහිර වෙරළ තීරයේ මහ ක්‍රිකට් ගැටුම” :(Battle of the West Coast) ජුනි 14 දින වෙන්නප්පුව ඇල්බට් පීරිස් ක්‍රීඩාංගණයේදී ඉතා උත්කර්ෂවත් ලෙස පැවැත්වීමට සූදානම් කර ඇත.
එම තරගයේ කුසලානය සහ නිල ජර්සි එළිදැක්වීම සහ තරගය පිළිබඳ මාධ්‍ය දැනුවත් කිරීමේ උත්සවය හලාවත ශ්‍රී විජයාරාමාධිපති හලාවත සුමනසිරි ස්වාමින් වහන්සේගේ අනුශාසකත්වයෙන්, හලාවත ආනන්ද විද්‍යාලයේ විදුහල්පති අරුණ ගුණසිරි මහතාගේ සහ මීගමුව හරිස්චන්ද්‍ර විද්‍යාලයේ විදුහල්පති විමුක්ති දේශප්‍රිය සිරිවර්ධන මහතාගේ ප්‍රධානත්වයෙන් පසුගියදා හලාවත නිලාවින් උත්සව ශාලාවේදී පවත්වන ලදී.
හලාවත ආනන්ද විද්‍යාලයේ 75 වන සංවත්සරය ද මෙම වර්ෂයට යෙදී ඇති නිසා මෙම තරගය ඉතා උත්කර්ෂවත් ලෙස පැවැත්වීමටත්, 14 සෙනසුරාදා දින උදෑසන 7ට ආනන්ද විද්‍යාලය අසලින් ආරම්භ කරන රථ පෙළපාලියකින් තරගයට සහභාගි වීම සඳහා පිටත්ව යෑමටත් කටයුතු සූදානම් කර ඇති බව ආනන්ද විද්‍යාලයේ විදුහල්පති අරුණ ගුණසිරි මහතා ‘දිවයින’ට පැවසීය.
ස්වර්ණ ශ්‍රී මහවත්ත – හලාවත විශේෂ
