ශ්‍රී ලංකා ක්‍රිකට් ආයතනයේ මෙහෙය වීමෙන් පැවැති අන්තර් සමාජ ටියර් බී කොටසේ ක්‍රිකට් තරගාවලියේ ශූරතාව දිනා ගැනීමට මැලේ ක්‍රිකට් සමාජය (09 දා) සමත්විය. අදාළ අවසන් මහ තරගයේදී එස්.එස්.සී. පිලට එරෙහිව කඩුලු 6ක පහසු ජයක් වාර්තා කළ මැලේ ක්‍රීඩකයෝ ශූරතා කුසලානට අමතරව මුදලින් රුපියල් ලක්ෂ හතහමාරක ජය මල්ලකට ද හිමිකම් කීවේය.
කොළඹ කෝල්ට්ස් ක්‍රීඩා පිටියේ පැවැති මෙම තරගයේදී පළමුව පන්දුවට පහර දුන් එස්.එස්.සී. කණ්ඩායම පන්දුවාර 19.4කදී සියලුදෙනා ලකුණු 100කට දැවී ගිය අතර එම ඉලක්කය හඹා ගිය මැලේ පිතිකරුවෝ ඉලක්කය පන්දු 10ක් ඉතිරිව තිබියදී කඩුලු 4ක් පමණක් දැවී රැස් කර ගැනීමට සමත්වූහ.
මෙම තරගයේදී එස්.එස්.සී. කණ්ඩායමට ජාතික කණ්ඩායම නියෝජනය කරන ලද ක්‍රීඩකයින් 6 දෙනෙකු ඇතුළත්ව සිටිය ද මැලේ කණ්ඩායමට ජාතික කණ්ඩායම නියෝජනය කරන ලද එකම ක්‍රීඩකයකු හෝ ඇතුළත් නොවුණු පසුබිමක මෙම ජයග්‍රහණය ඔවුන් වාර්තා කිරීම සුවිශේෂීත්වයක් එක් කරවන්නක් විය. චමිඳු වික්‍රමසිංහ, දසුන් ශානක, අවිශ්ක ප්‍රනාන්දු, චරිත් අසලංක, නුවනිඳු ප්‍රනාන්දු සහ ප්‍රමෝද් මදුශාන් ශ්‍රී ලංකා ජාතික කණ්ඩායම නියෝජනය කරමින් අද තරගයේදී එස්.එස්.සී. පිල නියෝජනය කළ ක්‍රීඩකයෝ වූහ.
පන්දු යැවීමේදී තිමිර මල්ශාන් කඩුලු 3ක් දවා ගනිද්දී කාවින්ද ඊශ්වර සහ චානක දේවින්ද කඩුලු 2 බැගින් දවා ගනිමින් එස්.එස්.සී. පිතිකරු බලඇණියේ බලය බිඳූහ. පන්දුවට අමතරව පිත්තෙන් ලකුණු 26ක් රැස් කර ගත් කාවින්ද ඊශ්වර අවසන් මහ තරගයේ වීරයා ලෙසින් සම්මාන දිනා ගත්තේය. තරගාවලියේ ජය සංකේත ප්‍රදානය ශ්‍රී ලංකා ක්‍රිකට් ආයතනයේ විධායක කමිටු සාමාජික සහ තරග සංවිධායක කමිටු සභාපති නලීන් අපෝන්සු මහතාගේ ප්‍රධානත්වයෙන් පැවැත්විණ.
ඊට අමතරව තරගාවලියේ දක්ෂතම පිතිකරු ලෙස යුනයිටඩ් සදර්න් ක්‍රීඩා සමාජයේ දෙනුවන් රාජකරුණා ද දක්ෂතම පිතිකරු ලෙසින් ගාල්ල ක්‍රීඩා සමාජයේ අමිත කෞෂල්‍ය ද තරගාවලියේ වීරයා ලෙසින් එස්.එස්.සී. කණ්ඩායම් නායක අවිශ්ක ප්‍රනාන්දු සම්මාන දිනාගත්හ.
එස්.එස්.සී. පන්දුවාර 19.4 කදී සියලුදෙනා දැවී ලකුණු 100 යි – (දිනුර කලුපහන 19, අවිශ්ක ප්‍රනාන්දු 35, තිමිර මල්ෂාන් 21/3, කාවින්ද ඊශ්වර 21/1, චානක දේවින්ද 14/2)
මැලේ කණ්ඩායම පන්දුවාර 18.2 කදී කඩුලු 4ක් දැවී ලකුණු 101යි – (හිරන්ත ජයසිංහ 19, කාවින්ද ඊශ්වර 26, බුද්ධික හසරංග 25)
