වර්ෂ 2020 දී ශ්‍රී ලංකාවේ පැවැති ලංකා ප්‍රිමියර් ලීග් (එල්.පී.එල්.) ක්‍රිකට් තරගාවලියේදී ක්‍රීඩා තරග මුදලට පාවාදීම සඳහා ශ්‍රී ලාංකික ක්‍රිකට් ක්‍රීඩක තරිඳු හසංක රත්නායක පෙලඹවීම ඇතුළු චෝදනා යටතේ හිටපු ශ්‍රී ලංකා ජාතික ක්‍රිකට් ක්‍රීඩක සචිත්‍ර මධුසංඛ සේනානායකට එරෙහිව නීතිපතිවරයා විසින් හම්බන්තොට මහාධිකරණය හමුවේ අධිචෝදනා ගොනුකර නඩු පවරනු ලැබීය.
ක්‍රීඩා දූෂණ වැළැක්වීමේ පනත යටතේ ශ්‍රී ලංකා ක්‍රිකට් ක්‍රීඩකයකුට එරෙහිව මහාධිකරණයක් හමුවේ පවරනු ලැබූ ප්‍රථම නඩුකරය වන එම නඩුවේ අධිචෝදනා පත්‍රය රජයේ අධිනීතිඥ අකිලා දල්පතාදු මහත්මියගේ අත්සනින් මහාධිකරණය හමුවේ ගොනුකර තිබේ.
2020.11.21 සහ 2020.11.22 අතර කාලය තුළදී මුරුසි දූපතේදී සහ හම්බන්තොටදී එකී ක්‍රිකට් තරගාවලියේ ප්‍රතිඵලයට, ප්‍රගතියට හා පැවැත්මට හෝ වෙනත් අංගයකට බලපෑම් කිරීම සඳහා යම් ක්‍රියාවක් සිදුකිරීමෙන් හෝ යම් ක්‍රියාවක් කිරීමෙන් වැළකී සිටීමට එනම් කළම්බු කිංග්ස් කණ්ඩායමේ ක්‍රීඩකයකු ලෙස තෝරාගෙන තිබූ තරිඳු හසංක රත්නායක හෙවත් ‘දැතාට’ වෙනත් අයකු කළ යෝජනාවක් ජාත්‍යන්තර ක්‍රිකට් කවුන්සලයේ දූෂණ විරෝධී ඒකකය වෙත දැනුම්දීම වැළැක්වීම සඳහා තරිඳු රත්නායකගෙන් අයැදීම, ඔහුව පෙලඹවීම හෝ උපදෙස් ලබාදුන්නේ යැයි එමගින් චෝදනා නඟා තිබිණි.
මෙතෙක් අත්අඩංගුවට ගෙන නොමැති සායිදි (SHAIDI) නමැත්තා තරිඳු රත්නායක අමතමින් “Already spoke to the Managment you will get games, and you have to give something for them too ok” කළ දැනුම්දීම ජාත්‍යන්තර ක්‍රිකට් කවුන්සලයේ දූෂණ විරෝධී ඒකකය වෙත පැමිණිලි කිරීම වැළැක්වීම මගින් 2019 අංක 24 දරන ක්‍රීඩාවලට සම්බන්ධ වැරදි වැළැක්වීමේ පනතේ 5ඈ වගන්තිය උල්ලංඝනය කිරීමෙන් ක්‍රීඩාවල දූෂණය යන වැරදි සිදුකිරීමෙන් දඬුවම් ලැබිය හැකි වැරදි සිදුකර ඇතැයි ද එමගින් චෝදනා නඟා තිබිණි. ලැබුණ පැමිණිලි අනුව ජාත්‍යන්තර ක්‍රිකට් කවුන්සලයේ දූෂණ විරෝධී ඒකකයේ උපදෙස් පරිදි විමර්ශන සිදුකළ ක්‍රීඩා දූෂණ වැළැක්වීමේ ඒකකය විත්තිකාර සචිත්‍ර සේනානායක අත්අඩංගුවට ගෙන අධිකරණයට ඉදිරිපත් කිරීමට පියවර ගෙන තිබිණි. රක්‍ෂිත බන්ධනාගාරගත කර තැබීමෙන් අනතුරුව ඇපමත මුදාහළ ඔහුගේ කටහඬ පිළිබඳ ඉදිරිපත් කළ කටහඬ සාම්පල් ඇතුළු වාර්තා හා සෙසු විමර්ශන වාර්තා සාක්‍ෂි සලකා බැලූ නීතිපති පාරින්ද රණසිංහ මහතා (කනිෂ්ඨ) එකී නඩු පැවැරීම සිදුකර තිබිණි. ජාත්‍යන්තර ක්‍රිකට් කවුන්සලයේ දූෂණ විරෝධී ඒකකයේ ප්‍රධානී ජ්‍යෙෂ්ඨ අතිරේක සොලිසිටර් ජනරාල් ජනාධිපති නීතිඥ සුමති ධර්මවර්ධන මහතාගේ මගපෙන්වීම යටතේ එකී විමර්ශන සිදුකර තිබිණි.
ඒ. ජේ. ඒ. අබේනායක සහ මත්තල – දිලිප් එන්. ජයසේකර
