මත්ස්‍ය සැපයුම අඩුවීම හේතුවෙන් මේ දිනවල මාළු මිල විශාල වශයෙන් ඉහළ ගොස් ඇති බැව් ගාල්ලේ පාරිභෝගිකයෝ පවසති. අයහපත් කාලගුණික තත්ත්වය හේතුවෙන් ධීවර කාර්මිකයින් මුහුදු යෑමෙන් වැළකී සිටීම හේතුවෙන් මත්ස්‍ය අස්වැන්න අඩුවී ඇත. මේ හේතුවෙන් සෑම මත්ස්‍ය වර්ගයකම කිලෝවක මිල රුපියල් 1300-1500 දක්වා ඉහළ ගොස් ඇති බැව් පාරිභෝගිකයෝ පෙන්වා දෙති.
රුපියල් තුන්සියයකට පමණ තිබූ ලින්නෝ කිලෝවක් රුපියල් 1300 දක්වා වැඩිවී ඇත. බලයා, කෙළවල්ලා යන මත්ස්‍ය වර්ගවල මිල ගණන් ද විශාල වශයෙන් වැඩිවී ඇත. මාළු මිල ඉහළ යන අවස්ථාවලදී සාධාරණ මිලකට පාරිභෝගිකයන්ට මාළු අලෙවි කිරීමේ වැඩපිළිවෙළක් තවමත් රජය මගින් ආරම්භ කොට නොමැති බැව් ගාල්ල දිස්ත්‍රික් ධීවර සමුපකාර සංගමයේ සභාපති පී.බී. ගාමිණී මහතා පවසයි.
මේ පිළිබඳ අදහස් දක්වමින් හෙතෙම මෙසේ ද කීවේය.
මත්ස්‍යයින් ගබඩා කිරීම සඳහා තිබූ ශීතාගාර පසුගිය රජය මගින් තුට්ටුවට දෙකට විකුණා දැම්මා. මාළු මිල අඩුවන අවස්ථාවලදී මත්ස්‍යයින් මිලදී ගෙන ගබඩා කිරීම සඳහා ශීතාගාර පහසුකම් දැන් නැහැ. ශීතාගාර තිබුණා නම් මාළුවල මිල අඩුවන විටදී මාළු මිලදී ගෙන මාළු මිල වැඩිවන විට පාරිභෝගිකයින්ට සාධාරණ මිලකට මාළු ලබාදීමට තිබුණා. මේ සඳහා වැඩපිළිවෙළක් සකස් කරන ලෙස රජයෙන් ඉල්ලා සිටිනවා යැයිද ගාමිණී මහතා සඳහන් කළේය.
මේ අතර ගාල්ලට බලපෑ අයහපත් කාලගුණ තත්ත්වය හේතුවෙන්, ගාල්ල ධීවර වරායේ නතර කර තිබූ බහුදින යාත්‍රාවක් පෙරළී යෑමෙන් හානියට පත්ව තිබුණි.
අධික සුළං තත්ත්වයත් සමග යාත්‍රාව ජැටියේ වැදීමෙන් යාත්‍රාවේ කොටසක් කැඩී ගොස් තිබුණි. ගාල්ල ධීවර වරායේ නතර කොට තිබූ බහුදින යාත්‍රා එකිනෙක ගැටීමෙන් බහුදින යාත්‍රා විශාල සංඛ්‍යාවකට හානි වී ඇති බැව් ධීවර කාර්මිකයෝ පවසති. මේ අතර අයහපත් කාලගුණික තත්ත්වය හේතුවෙන් ගාල්ල ධීවර වරායේ මසුන් ගොඩ බෑම ද සිදුවුණේ ඉතාමත් සුළු වශයෙනි.
ලලිත් චාමින්ද සහ එස්.කේ. කලුආරච්චි – ගාල්ල
