පුද්ගලයින් දෙදෙනකු අතර ඉඩම් ආරවුලක් හේතු කරගෙන ඇති වූ බහින් බස්වීමක් දුරදිග යෑමෙන් වූ ගැටුමක දී එල්ල කළ පිහි පහරකින් එක් අයකු මිය ගොස් තවත් අයකු තුවාල ලබා ප්‍රතිකාර සඳහා රෝහල් ගත කර තිබේ.
පෙරේදා (02 වැනිදා) රාත්‍රී 8.00ට පමණ මෙම සිදුවීම වී ඇත්තේ කටුනේරිය ශාන්ත අන්තෝනි මාවතේ පිහිටි නිවසක් තුළය. සිද්ධියෙන් මිය ගොස් ඇත්තේ කටුනේරිය – ශාන්ත අන්තෝනි මාවත පදිංචිව සිටි පල්ලියරාළලාගේ දොන් දමිත් මධුර අසංග (අවු:43) නම් අයෙකි.
සිද්ධියෙන් තුවාල ලබා ඇති කටුනේරිය – ශාන්ත අන්තෝනි මාවත පදිංචිකරුවකු වන පොන්නම්පෙරුමගේ සුමෙත් ශ්‍රී සන්රූ ප්‍රනාන්දු (අවු:24) යන අය ප්‍රතිකාර සඳහා මාරවිල මූලික රෝහලට ඇතුළත් කර ඇත. මිය ගොස් ඇති අය උල් ආයුධයක් ද සමග තම පිය පාර්ශවයේ ඥාතියකුගේ නිවසට ගොස් බහින් බස්වීමක් ඇති කර ගෙන ඇති බවත්, ඉඩම් ආරවුලක් ඊට හේතුව වී ඇති බවත් පොලිසිය කියයි. එම බහින් බස්වීම දුර දිග ගොස් මිය ගොස් ඇති අය විසින් තුවාල ලබා ඇති අයට තමා අත තිබූ උල් ආයුධයෙන් පහර දී ඇති බවත්, එම අවස්ථාවේදී තුවාලකරු විසින් ද තියුණු ආයුධයකින් ප්‍රතිප්‍රහාර එල්ල කර ඇති බවත් විමර්ශනවල දී අනාවරණය වී ඇති බව පොලිසිය කියයි. සිද්ධියෙන් තුවාල ලබා සිටි දෙදෙනා ම ඔවුන්ගේ ඥාතීන් විසින් ප්‍රතිකාර සඳහා මාරවිල මූලික රෝහලට ඇතුළත් කර ඇත. ප්‍රතිකාර ලබමින් සිටින අතරතුර එක් අයකු මිය ගොස් ඇති අතර, අනෙක් තුවාලකරු පොලිස් ආරක්ෂාව යටතේ ප්‍රතිකාර ලබමින් සිටියි. මහෙස්ත්‍රාත් පරීක්ෂණය පැවැත්වීමට නියමිතව තිබුණි.
