ගුණාත්මක සහ ආරක්ෂිත මගී ප්‍රවාහන සේවයක් වෙනුවෙන් ආරම්භ කළ වැඩසටහනක් – නුවරඑළිය දිස්ත්‍රික් ප්‍රධාන මෝටර් රථ පරීක්ෂක ජාලිය බණ්ඩාර
හැටන් බස් නැවතුම් පළේ සිට ධාවනයට එක් කර ඇති දුර සහ කෙටි දුර ධාවන ලංගම සහ පෞද්ගලික බස් රථ නුවරඑළිය දිස්ත්‍රික් ප්‍රධාන මෝටර් රථ පරීක්ෂක ජාලිය බණ්ඩාර මහතා සහ එම කාර්යාල නිලධාරීන් විසින් හදිසි පරීක්ෂාවකට ලක් කෙරිණ.
හැටන් පොලිසියේ රථ වාහන අංශයේ නිලධාරීන් සමග එක්ව මෙම හදිසි පරීක්ෂාව සිදු කළේය.
මෙම පරීක්ෂාවේදී ලංගම සහ පෞද්ගලික බස් රථ 45ක් පරීක්ෂාවට ලක් කළ අතර, ඉන් ලංගම බස් රථ 15ක් සහ පෞද්ගලික බස් රථ 19ක් තාවකාලිකව ධාවනයෙන් ඉවත් කිරීමට මෝටර් රථ පරීක්ෂකවරයා පියවර ගැණින.
සිදු කළ හදිසි පරීක්ෂාවේදී බස් රථ මගී ප්‍රවාහන සේවයට සුදුසු තත්ත්වයක තිබේ ද යන්න පිළිබඳ විශේෂ අවධානය යොමු කළ අතර, ධාවනයට නුසුදුසු තත්ත්වයෙන් ධාවනයට එක් කර තිබූ ලංගම සහ පෞද්ගලික බස් රථ කිහිපයක් තාවකාලිකව ධාවනයෙන් ඉවත් කිරීමට මෝටර් රථ පරීක්ෂකවරයා විසින් පියවර ගත් අතර, එම වාහනවල තිබූ අඩුපාඩුකම් දින 30ක් ඇතුළත අලුත්වැඩියා කර මෝටර් රථ පරීක්ෂකවරයාගේ පරීක්ෂාවට යළිත් ඉදිරිපත් කළ යුතුය.
මෙම පරීක්ෂාවේදී ඇතැම් බස් රථවල මගීන්ට අන්ත්‍රාදායක ලෙස වාහනයේ සවිකර තිබූ උපාංග ගලවා ඉවත් කරන ලෙසත්, එම බස් රථවල රියදුරන්ට උපදෙස් ලබා දුන් අතර, එම උපාංග ගලවා යළිත් බස් රථ මෝටර් රථ පරීක්ෂකවරයාට පෙන්වන තෙක් එම බස් රථවල වාර්ෂික ආදායම් බලපත්‍රය නුවරඑළිය පොලිසිය භාරයට ගැණින.
ගුණාත්මක සහ ආරක්ෂිත මගී ප්‍රවාහන සේවයක් සැලසීමේ අරමුණින් මෙම හදිසි පරීක්ෂාව සිදුකළ බවත්, මෙවැනි පරීක්ෂාවන් නුවරඑළිය දිස්ත්‍රික්කය පුරා සිදු කරන බව නුවරඑළිය දිස්ත්‍රික් ප්‍රධාන මෝටර් රථ පරීක්ෂක ජාලිය බණ්ඩාර මහතා කියා සිටියේය.
නුවරඑළිය – නාලක රත්නායක
