පෙර දඬුවම් අමතක නම් 10 වැනි විත්තිකරුට මතක හිටින දඬුවමක් දීමට සූදානම්
විනිසුරු
පසුගිය අරගල සමයේදී එනම් 2022 මැයි 9 වැනිදා යුනියන් පෙදෙසේ පිහිටි හිටපු අමාත්‍ය ජොන්ස්ටන් ප්‍රනාන්දු මහතාට අයත් හොටෙල් කලම්බු නමැති සංචාරක හෝටලයට පොලු මුගුරු රැගෙන කඩාවැදී අලාභහානි කිරීම, එහි නවතා තිබූ ජීප් රථ දෙකකට පහරදී රුපියල් ලක්‍ෂ තිස් පහකට අධික අලාභයක් සිදුකිරීම ඇතුළු චෝදනාවලට වරද පිළිගත් කොළඹ මහ නගර සභාවේ හිටපු නාගරික මන්ත්‍රීවරයකු වන මොහොමඩ් ඉස්මයිල් මොහොමඩ් අනාස් ඇතුළු විත්තිකරුවන් දසදෙනකුට බරපතළ වැඩසහිත වසර දෙක බැගින් වූ සිරදඬුවම් නියම කළ කොළඹ මහාධිකරණ විනිසුරු ලංකා ජයරත්න මෙනෙවිය එම සිරදඬුවම් ක්‍රියාත්මක කිරීම අත්හිටුවීමට ද ඊයේ (09දා) නියෝග කළාය.
විත්තිකරුවන් අතරින් නවදෙනකුට රුපියල් 65,000 බැගින් වූ දඩයක් ද එම හෝටලයට අයත් ලැප්ටොප් පරිගණකයක් පැහැරගෙන යෑමේ චෝදනාවට ද වරදකරු කරනු ලැබූ පළමුවන විත්තිකාර මොහොමඩ් මුස්නි මුබාරක් නමැත්තාට රුපියල් 80,000ක දඩයක් ද නියම කළ විනිසුරුවරිය විත්තිකරුවන් අධිකරණයේ කාලය හා පැමිණිල්ලේ කාලය වැය නොකර මුල් අවස්ථාවේදී වරද පිළිගැනීම නිසා එවන් ලිහිල් දඬුවම් නියම කරන බව කීවාය.
එම නඩුව ඊයේ (09දා) කැඳවූ අවස්ථාවේදී සිය සේවාදායකයන් වරද පිළිගෙන කෙටි ක්‍රමයකින් නඩුව අවසන් කර ගැනීමට සූදානම් බවත් හෝටලයට සිදුවූ අලාභයට හා ජීප් රථ දෙකට සිදුවූ අලාභහානිවලට රුපියල් ලක්ෂය බැගින් වන්දි ගෙවීමට සූදානම් බවත් විත්තිකරුවන් වෙනුවෙන් පෙනී සිටි ජ්‍යෙෂ්ඨ නීතිඥ සේනක පෙරේරා හා නීතිඥ ලක්ෂිත විතානගේ යන මහත්වරු පැවැසූහ.
අගතියට පත් පාර්ශ්වය එකඟ නම් විත්තිකරුවන් වෙනුවෙන් කරන එම ඉල්ලීමට අවසර ලබාදීම සම්බන්ධයෙන් තමන් විරුද්ධත්වයක් නොදක්වන බව නීතිපතිවරයා වෙනුවෙන් පැමිණිල්ල මෙහෙයවන රජයේ අධිනීතිඥ කේෂාණි විජේසිංහ මහත්මිය පැවසුවාය.
එහිදී පැමිණිල්ලේ 11 වන සාක්‍ෂිකරු ලෙස නම්කොට තිබූ ජෝන්ස්ටන් ප්‍රනාන්දු මහතා වෙනුවෙන් පෙනී සිටි නීතිඥ නිරෝෂන් සිරිවර්ධන මහතා, විත්තිකරුවන් එදින හෝටලයට කඩාපැන පෙට්‍රල් දමා ගිනි තැබීමට උත්සාහ දරා ඇති බවත් විදේශ සංචාරකයන්ගේ මැදිහත්වීම මත එම උත්සාහය වැළකී ඇති බවත් කීවේය.
සිය සේවාදායකයාගේ දියණිය කාමරයකට දමා ගිනි තබා ඝාතනය කිරීමට ඔවුන් උත්සාහ දැරීම නිසා වහලයෙන් බැස ඇයව බේරාගැනීමට සිදුවී ඇති බවද හෙතෙම කියා සිටියේය. එකී ප්‍රහාර නිසා හෝටලයට මිලියන 9කට අධික අලාභයක් සිදුවී ඇතත් විත්තිකරුවන් ලබාදීමට එකඟ වූ වන්දිය හෝ ලබාගැනීමට සිය සේවාදායකයා අකැමැති බවත් විත්තිකරුවන් වරද පිළිගෙන ඇති බැවින් ඔහු කිසිදු වන්දියක් ඔවුන්ගෙන් අපේක්ෂා නොකරන බවද නීතිඥ නිරෝෂන් සිරිවර්ධන මහතා වැඩිදුරටත් පැවැසීය.
ජීප් රථ හිමිකරුවන් වෙනුවෙන් පෙනී සිටි නීතිඥවරුන් චෝදනාවල සඳහන් මුදලට වඩා විශාල අලාභයක් සිය සේවාදායකයන්ගේ වාහනවලට සිදු වී ඇතත් ඔවුන් දෙදෙනා ද විත්තිකරුවන්ගෙන් කිසිදු වන්දි මුදලක් අපේක්ෂා නොකරන බවද පැවැසූහ.
තුන්වන විත්තිකරු හැර සෙසු විත්තිකරුවන් වෙනුවෙන් පෙනී සිටි ජ්‍යෙෂ්ඨ නීතිඥ සේනක පෙරේරා මහතා කරුණු දක්වමින් එක් විත්තිකරුවකු එම සිද්ධිය වන විට 17 හැවිරිදි තරුණයකු බවත් ඔහු ඇතුළු සෙසු සේවාදායකයන් 9 දෙනාම පෙර වැරදි නොමැති පුද්ගලයන් වන බැවින් ඔවුනට සමාජ ගතවිය හැකි පරිදි ලිහිල් දඬුවම් ලබාදෙන ලෙස ඉල්ලා සිටියේය. එම අවස්ථාවේදී එම විත්තිකරුවන්ගේ පෙර වැරදි වාර්තා නිරීක්ෂණය කළ මහාධිකරණ විනිසුරුවරිය පෙර වැරදි නොමැති බවට 10 වන විත්තිකරු නීතිඥවරයාට උපදෙස් ලබාදී ඇත්නම් එය සත්‍යයෙන් තොර ප්‍රකාශයක් බවත් වෙනත් අධිකරණ දෙකක් විසින් ඔහුට දඬුවම් ලබාදී ඇති බැවින් නැවත ඔහුගෙන් ඒ සම්බන්ධයෙන් උපදෙස් ලබාගන්නා ලෙස විත්තියේ නීතිඥවරයාට දැනුම් දුන්නේය.
විත්තිකරුට එකී අධිකරණ විසින් ලබාදී ඇති පෙර දඬුවම් අමතක වී ඇති නම් මතක සිටින දඬුවම් ලබාදීමට තම අධිකරණය සූදානම් බව පෙන්වා දෙමින් මහාධිකරණ විනිසුරුවරිය ලබාදුන් එම අවසරයෙන් විත්තිකරු අසලට ගිය නීතිඥ සේනක පෙරේරා මහතා විත්තිකරුගෙන් නැවත විමසීමේදී තමාට වෙනත් අධිකරණයක් විසින් දඬුවම් ලබාදී ඇති බව විත්තිකරු පිළිගත්තේය.
විත්තිකරුවන් සිදුකර ඇත්තේ ඉතා බරපතළ වැරදි බව පෙන්වා දුන් විනිසුරුවරිය විත්තිය වෙනුවෙන් පෙනී සිටි උගත් නීතිඥවරුන් කළ කරුණු දැක්වීම් සලකා බලමින් නැවත සමාජ ගතවිය හැකි පරිදි තම අධිකරණය ලිහිල් දඬුවම් නියම කරනා නමුත් නැවත එවැනි වැරදි සිදුනොකරන ලෙසට විත්තිකරුවන්ට දැඩිව අවවාද කළාය. විත්තිකරුවන්ට නියම කළ සිරදඬුවම් වසර 10, 12 සහ 15ක කාලයකට අත්හිටුවීමට නියෝග කෙරිණි.
තම අධිකරණය විසින් නියම කළ දඩ ගෙවීම සඳහා ඉඩකඩ දෙමින් එම නඩුව ලබන අගෝස්තු 28 වැනිදා යළි කැඳවීමට ද විනිසුරුවරිය නියම කළාය. අධිකරණය නියම කළ දඬුවම් ඇතුළු තීන්දුව මහාධිකරණ භාෂණ පරිවර්තක ටී.එම්. තුවාන් සදාම් මහතා විත්තිකරුවන්ට කියවා දුන්නේය.
ඒ.ජේ.ඒ. අබේනායක
