ලක්‍ෂ 130ක ණය මුදලකට අගරු චෙක්පත් දීම:
රුපියල් ලක්‍ෂ 130ක ණය මුදලක් ලබාගෙන අගරු චෙක්පත් ලබාදී වංචා කළ ව්‍යාපාරිකයකු සම්බන්ධයෙන් අසත්‍ය තොරතුරු අධිකරණයට ඉදිරිපත් කර නඩු කටයුත්තෙන් ඔහුව නිදහස් වන පරිදි කටයුතු කර ඇති අපරාධ පරීක්‍ෂණ දෙපාර්තමේන්තුවේ නිලධාරීන් සම්බන්ධයෙන් නිසි පියවර ගන්නා ලෙස හා තමාට සාධාරණයක් ඉටුකර දෙන ලෙස ඉල්ලා ඔස්ටේ්‍රලියාවේ පදිංචිව සිටි දීපා ප්‍රියදර්ශනී ආදිහෙට්ටි මහත්මිය ජනාධිපතිවරයා වෙත පැමිණිල්ලක් කර තිබේ.
කුලියාපිටිය කිරින්දව ප්‍රදේශයේ පදිංචි අනුරාධ නලින් ජයකොඩි ඉරේෂා ප්‍රියදර්ශනී යන යුවළ චෙක්පත් තුනක් හා මුදල් ලබාගත් බවට මුද්දරයක් මත අත්සන් කළ ලිපියක් ද ලබාදී එම ණය මුදල ලබාගත් නමුත් විමර්ශන නිලධාරීන් අධිකරණයට ඉදිරිත් කර ඇත්තේ රුපියල් ලක්‍ෂ අසූවකට අදාළ චෙක්පත පමණක් බවත් තමා විදේශගතව සිටින බව දැන දැනත් හිතාමතාම අධිකරණයට අසත්‍ය තොරතුරු ඉදිරිපත් කර සැකකරුවන් නිදහස් වන පරිදි කටයුතු කර ඇති බවත් එම පැමිණිල්ල මගින් පෙන්වා දී තිබේ.
එම නඩු කටයුත්ත අවසන් වී වසරක් ගත වනතුරුත් ඒ සම්බන්ධයෙන් තමා දැනුවත් කිරීමට කිසිදු පියවරක් නොගත් විමර්ශන නිලධාරීන් අවම වශයෙන් අදාළ නඩු අංකය හෝ තමාට ලබා නොදුන් බවත් පෙන්වා දී තිබේ. 2024 වසරේදී නීතිඥවරයකු මාර්ගයෙන් සොයා බැලීමේදී මහෙස්ත්‍රාත් අධිකරණය ලබාදුන් තීන්දුවට එරෙහිව අභියාචනා කළ හැකි වසරක කාලය අවසන් වී තිබීම නිසා කිසිදු නෛතික පියවරක් ගැනීමට නොහැකි වූ බවද පෙන්වා දී තිබූ පැමිණිලිකාරිය හිටපු ජනාධිපතිවරයකුගේ පාසල් මිතුරකු වන සැකකාර ජයකොඩි නමැත්තාට තිබූ ඉහළ සබඳතා නිසා අපරාධ පරීක්‍ෂණ දෙපාර්තමේන්තුව එලෙස පක්‍ෂග්‍රාහී ආකාරයෙන් කටයුතු කොට ඇති බව පෙනෙන්නේ යැයි ද පෙන්වා දී තිබේ.
තමන් ගරු අධිකරණය ලබාදී ඇති තීන්දුවට හිසනමන නමුත් අපරාධ පරීක්‍ෂණ දෙපාර්තමේන්තුවේ නිලධාරීන් අධිකරණය නොමඟ යවමින් එවැනි තීන්දුවක් ලබාගෙන ඇති බව පෙනී යන හෙයින් එකී නිලධාරීන්ට එරෙහිව නිසි පියවර ගන්නා ලෙසට ද ඇය වැඩිදුරටත් ඉල්ලා තිබේ.
ඒ. ජේ. ඒ. අබේනායක
