ලොව අතිශයින් ජනප්‍රියම ටික්ටොක් සමාජ මාධ්‍ය ජාල තරුව වන සෙනගාල් -ඉතාලි ජාතික සෙයිරින්ජ් කාබී ලේම් කල් ඉකුත්වූ වීසා බලපත්‍රයක් සහිතව ඇමරිකා එක්සත් ජනපදයේ රැඳී සිටියදී ආගමන නිලධාරීන් විසින් අත්අඩංගුවට ගැනීමෙන් පසු එරටින් පිටව ගොස් තිබේ. කල් ඉකුත් වූ වීසා බලපත්‍රයක් සහිතව ඇමරිකා එක්සත් ජනපදයේ රැඳී සිටියදී ලේම් ඉකුත් සිකුරාදා හැරී රීඩ් ජාත්‍යන්තර ගුවන් තොටුපළේදී ආගමන නිලධාරීන් විසින් අත්අඩංගුවට ගෙන තිබිණි.
කෙසේ වුවද ඔහුට පිටුවහල් කිරීමේ නියෝගයකින් තොරව ඇමරිකාවෙන් පිට වීමට බලධාරීන් විසින් අවස්ථාව සලසා දී තිබේ. ඉකුත් අප්‍රේල් 30 වැනිදා ඇමරිකාවට පැමිණ ඇති 25 හැවිරිදි ලේම් කොරෝනා වසංගත සමයේදී කිසිදු වචනයක් නොපවසමින් ටික් ටොක් සමාජ මාධ්‍ය ජාලයට මුදා හැර තිබූ වීඩියෝපට හේතුවෙන් ලොව පුරා ජනප්‍රියත්වයට පත් වූ අතර එම සමාජ මාධ්‍ය ජාලය තුළ ඔහුට මිලියන 162ක් ඉක්මවූ අනුගාමිකයන් පිරිසක් සිටිති.
