ප්ලාස්ටික් අපද්‍රව්‍ය ගෝලීය වශයෙන් මිනිසා විසින් පරිභෝජනය කරනු ලබන ජලය හා ආහාර දූෂණය කිරීමට හේතු වී ඇති බව හෙළි වී තිබියදී ඉකුත් වසරේ දී (2024) ගෝලීය ප්ලාස්ටික් පරිභෝජනය ටොන් 516ක් දක්වා ඉහළ ගොස් තිබූ බව එක්සත් ජාතීන්ගේ පාරිසරික වැඩසටහන විසින් නිවේදනය කර තිබේ. පාරිසරික විද්‍යාඥයන් විසින් දිරාපත් නොවන ප්ලාස්ටික් අපද්‍රව්‍ය මිනිසාට අහිතකර අන්දමින් බලපාන අයුරු පිළිබඳව සාක්ෂි සහිතව පෙන්වා දී තිබියදීත් මෙතෙක් ප්ලාස්ටික් පරිභෝජනයේ ඉහළ යෑමක් මිස පහළ යෑමක් දක්නට නොලැබෙන බව එම වැඩසටහන වැඩිදුරටත් සඳහන් කර තිබේ. මේ අතර පසුගිය සතියේ මැලේසියාවේ සන්වේ විශ්වවිද්‍යාලයේ පැවති ‘වායු හා ප්ලාස්ටික් දූෂණය’ පිළිබඳ මාධ්‍යවේදීන් දැනුවත් කිරීමේ වැඩමුළුවකදී අදහස් දක්වමින් පාරිසරික විද්‍යාඥයන් පැවසුවේ ප්ලාස්ටික් නිෂ්පාදනයන්ගේ වාසිදායක බව නිසා එම නිෂ්පාදනයන් සඳහා පවතින ඉල්ලුම වැඩි වී ඇති බවත් පරිසරයට බැහැර කරන ප්ලාස්ටික් අපද්‍රව්‍යයන්ගෙන් මෙතෙක් ප්‍රතිචක්‍රීයකරණය කරනුයේ සියයට 9ක් වැනි සුළුප්‍රතිශතයක් වීම මත ප්ලාස්ටික් අපද්‍රව්‍යයන් හේතුවෙන් හටගන්නා සෞඛ්‍ය ගැටලු ඉදිරියේදී තවත් ඉහළ යනු ඇති බවයි. මේ හේතුවෙන් ප්‍රතිචක්‍රියකරණය කළ හැකි ප්ලාස්ටික් නිෂ්පාදනයන් එළිදැක්වීම ඉතා වැදගත් බවද ඔවුන් සඳහන් කර තිබිණි.
මේ වනවිට පවතින ගෝලීය ප්ලාස්ටික් නිෂ්පාදනයන් පරිභෝජනය කිරීමේ රටාව දිගටම පැවතියහොත් වසර 2060 වනවිට වාර්ෂික ගෝලීය ප්ලාස්ටික් නිෂ්පාදනයන්ගේ පරිභෝජනය ටොන් බිලියන 1.2ක් දක්වා ඉහළ යනු ඇතැයි එක්සත් ජාතීන්ගේ පාරිසරික වැඩසටහන විසින් නිවේදනයක් නිකුත් කරමින් සඳහන් කර තිබේ.
