ඇමෙරිකානු හමුදාවන් විසින් පසුගිය දිනවල ඉරානය වෙත එල්ල කළ ප්‍රහාරයන් දෙවැනි ලෝක යුද සමයේ ජපානයේ හිරෝෂිමා – නාගසාකි නගරවලට එල්ල වූ පරමාණු බෝම්බ ප්‍රහාරයන් හා සන්සන්දනය කිරීම සම්බන්ධයෙන් ජපානය ඇමෙරිකානු ජනාධිපති ඩොනල්ඩ් ට්‍රම්ප්ව හෙළා දැක තිබේ.
පසුගියදා ඇමෙරිකානු හමුදාවන් විසින් ඉරනායේ න්‍යෂ්ටික මධ්‍යස්ථාන වෙත එල්ල කළ ගුවන් ප්‍රහාර සම්බන්ධයෙන් අදහස් දක්වා ඇති ඇමෙරිකානු ජනාධිපති ට්‍රම්ප් “ජපානයේ හිරෝෂිමා හා නාගසාකි නගරවලට එල්ල වූ පරමාණු බෝම්බ ප්‍රහාරයන් දෙවැනි ලෝක යුද්ධය නිමාවට පත් කළා. මට හිරෝෂිමා ප්‍රහාරය මෙහිදී උදාහරණයක් ලෙස භාවිත කිරීමට අවශ්‍ය නැහැ. නාගසාකි ප්‍රහාරය ද උදාහරණයක් ලෙස භාවිත කිරීමට අවශ්‍ය නැහැ. එහෙත් එහිදී සිදුවූයේද ඒ දෙයමයි” යැයි පවසා තිබේ. ඇමෙරිකානු ජනාධිපතිවරයා විසින් සිදුකර ඇති ඉහත කී ප්‍රකාශය පිළිගත නොහැක්කක් බව ජපානයට එල්ල වූ පරමාණු බෝම්බ ප්‍රහාරයෙන් දිවි ගලවා ගත්තෙකු වූ මිමාකි ටොෂියුකි පවසා තිබේ. මේ අතර “මා මෙම ප්‍රකාශය සම්බන්ධයෙන් ඇත්ත වශයෙන්ම පසුතැවෙනවා. මට මේ මොහොතේ දැනෙනුයේ කෝපයක්” යැයි ජපානයට එල්ල වූ පරමාණු බෝම්බ ප්‍රහාරයෙන් දිවි ගලවා ගත් ටෙරුතෝ යෝකොයාමා නමැත්තා පවසා තිබේ.
ට්‍රම්ප් ජනාධිපතිවරයා ඇමෙරිකානු හමුදා විසින් ඉරානයට එල්ල කළ ප්‍රහාරය ඇමෙරිකාව විසින් ජපානයේ හිරෝෂිමා හා නාගසාකි නගරවලට පරමාණු බෝම්බ හෙළීමේ සිද්ධිය හා සසඳමින් සිදුකර ඇති ප්‍රකාශය ඉල්ලා අස්කර ගන්නා ලෙස ඉල්ලමින් පරමාණු බෝම්බ ප්‍රහාරයෙන් දිවි ගලවා ගත් ජපන් ජාතිකයෝ පෙරේදා (26දා) ජපානයේ හිරෝෂිමා නගරයේදී උද්ඝෝෂණයක් පවත්වා තිබේ. මේ අතර හිරෝෂිමා නගරයේ නීති සම්පාදකයන් පිරිසක් ද පනතක් සම්මත කරගනිමින් පරමාණු බෝම්බ ප්‍රහාරයන් සාධාරනීකරණය කරන ප්‍රකාශයන් ප්‍රතික්ෂේප කර තිබේ. අවි ආයුධ භාවිත කරමින් සිදුකරන යුද්ධයන් සමථයකට පත් කර ගත යුත්තේ සාමකාමි අයුරින් බව ඔවුහු පවසා තිබේ. ඇමෙරිකා එක්සත් ජනපදය විසින් 1945 වසරේ අගෝස්තු මාසයේදී ජපානයේ හිරෝෂිමා හා නාගසාකි නගරවලට පරමාණු බෝම්බ හෙළීම හේතුවෙන් පුද්ගලයන් 145,000ක් පමණ දෙනා මියගොස් තිබිණි.
සංස්කරණය – ඒමන්ති මාරඹේ
