සති දෙකකට පමණ පෙර ඉන්දියාවේ අහමද්‍රාබාද් නගරයේදී ගුවන්ගත කිරීමට යාමේදී කඩා වැටුණු මගීන් 242ක් රැගත් “එයාර් ඉන්ඩියා” ඩී්‍රම් ලයිනර් ගුවන් යානයේ එම අනතුර සම්බන්ධයෙන් පැවැත්වෙන විමර්ශනයට එක්සත් ජාතීන්ගේ සංවිධානයට අයත් විමර්ශන නිලධාරියෙකු සම්බන්ධ කිරීමට ඉදිරිපත් වූ යෝජනාවක් ඉන්දීය සිවිල් ගුවන් සේවා අමාත්‍යාංශය විසින් ප්‍රතික්ෂේප කර තිබේ.
ඉකුත් ජුනි 12 වැනිදා වෛද්‍ය නේවාසිකාගාර ගොඩනැඟිල්ලකට කඩා වැටුණු “එයාර් ඉන්ඩියා” ගුවන් සේවයට අයත් “ඩී්‍රම් ලයිනර්” මගී ගුවන් යානයේ අනතුර පිළිබඳව පැවැත්වෙන පරීක්ෂණ ප්‍රමාද වන බවට මතුව ඇති චෝදනා මධ්‍යයේ එක්සත් ජාතීන්ගේ විමර්ශකයකු විමර්ශනය සඳහා සම්බන්ධ කිරීමට යෝජනා වී තිබේ.
කෙසේ වුවද එම යෝජනාව ප්‍රතික්ෂේප කර ඇති ඉන්දීය සිවිල් ගුවන් සේවා අමාත්‍යාංශය එයාර් ඉන්ඩියා ගුවන් අනතුර සම්බන්ධයෙන් පැවැත්වෙන විමර්ශනය යටතේ සොයා ගැනුණු කළු පෙට්ටියෙහි ඇතුළත් ගුවන් ගමනෙහි පටිගත වී තිබූ දත්ත ඩවුන් ලෝඩ් (බාගත) කරගෙන
ඇති බව ප්‍රකාශ කර තිබේ. එක්සත් ජාතීන්ගේ විමර්ශකයෙකුට එයාර් ඉන්ඩියා ගුවන් යානා අනතුර සම්බන්ධයෙන් සිදු කෙරෙන විමර්ශනය සඳහා සම්බන්ධ වීමට ඉඩ නොතබන බවද ඉන්දීය බලධාරීන් විසින් ප්‍රකාශ කර ඇති බව ඉන්දියාවේ ‘එන්ඩීටීවී’ ප්‍රවෘත්ති වෙබ් අඩවිය විසින් වාර්තා කර තිබේ. මගීන් 241 දෙනෙකුට මරු කැඳවමින් කඩා වැටුණු ඉන්දියාවේ අහමද්‍රාබාද් නගරයේ සිට එංගලන්තයේ ලන්ඩන් අගනුවර දක්වා පියාසර කිරීමට තැත් කළ ඉන්දීය ගුවන් යානයේ අනතුර පිළිබඳව පැවැත්වෙන පරීක්ෂණ කටයුතු අනාවරණය නොවීම නිසා ඒ සම්බන්ධයෙන් සමාජයේ විවිධ කොටස් මෙන්ම ඉන්දීය විපක්ෂය පවා ප්‍රශ්න කර තිබිණි. කෙසේ වුවද මෙම විමර්ශනය සිදුකරන ඉන්දීය ගුවන් අනතුරු විමර්ශන කාර්යාංශය මේ සම්බන්ධයෙන් කිසිවක් ප්‍රකාශ කර නොමැත.
