ගුණදාස කපුගේ මියැසි ප්‍රත්‍යාවලෝකනය
29 වැනිදා
1970 දශකයේ සිංහල සංගීත ක්ෂේත්‍රයට පිවිස 1980 දශකයේ සංගීත ක්ෂේත්‍රයේ තහවුරු වී 1990 දශකයේ ජනප්‍රියතම ගායන ශිල්පියා බවට පත් වී විසිවන සියවසේදී අප අතරින් වෙන්ව ගියත් අද දක්වාම ලාංකේය සංගීත ක්ෂේත්‍රයේ නොමැකෙන හඬ පෞරුෂයෙන් රසික සිත් ආනන්දයට පත් කරන ගීතාවලියක හිමිකරු ගුණදාස කපුගේ සූරීන් ස්වකීය හඬෙහි කලාත්මක බව සිංහල ජන සංගීත සම්ප්‍රදාය, පෙරදිග සංගීතය හා නූතනත්වය සමග මුසු කළ කපුගේ සූරීන් සිංහල නාට්‍ය සංගීතය, චිත්‍රපට සංගීතය මෙන්ම ගුවන් විදුලිය හා රූපවාහිනියත් ස්වකීය නිර්මාණ ප්‍රතිභාවෙන් පෝෂණය කළේය.
මිත්‍ර කපුගේ සිය පිය උරුමය ඉදිරියට ගෙනයන කපුගේ පරපුරේ නූතන සලකුණය. විශ්ව සංගීතය පිළිබඳ විදෙස් අධ්‍යාපනයෙන් ලත් දැනුමත්, උරුම ප්‍රතිභාවත් මුසු කරමින් කපුගේ ගීතාවලිය නූතන පරපුරට සමීප කරන්නට දශකයට අධික කාලයක් තිස්සේ මිත්‍ර කපුගේ කටයුතු කරමින් සිටී. ඒ කාර්යයෙහි මං සලකුණක් බඳු සබඳ අපි – ගුණදාස කපුගේ මියැසි ප්‍රත්‍යාවලෝකනය මේ මස 29 වැනිදා සවස 6.30ට විහාරමහා දේවි එළිමහන් රංග පීඨයේදී පැවැත්වේ.
ගුණදාස කපුගේ ගීතාවලියෙහි රසය එලෙසින්ම සහෘදයන්ට සමීප කෙරෙන මේ ප්‍රසංගයේ සංගීත අධ්‍යක්ෂණය ප්‍රවීණ සංගීත අධ්‍යක්ෂ මහින්ද බණ්ඩාරගෙනි. ප්‍රසංග පිටපත හා නිවේදනය ඔසඳ ගුණරත්න විසිනි. ප්‍රසාද් කුමාරතුංග සමගින් පුන්මිලා යකුපිටිය සහය ගැයුම්වලට එක්වෙති.
සබඳ අපි – ගුණදාස කපුගේ මියැසි ප්‍රත්‍යාවලෝකනය වැනි දැවැන්ත සංගීතමය අත්දැකීමක් ලාංකේය රසිකයන්ට තිළිණ කෙරෙන්නේ සිද්ධි විනායක් සිනෙ ආර්ට්ස් සහ සහන්‍යා පදනම විසිනි. දශක දෙකකට ආසන්න කාලයක් විදේශීය චිත්‍රපට බෙදාහැරීම හා බොලිවුඩ් සංගීත ප්‍රසංග සංවිධාන කාර්යයේ ප්‍රමුඛත්වයක් ගත් සිද්ධි විනායක් සිනෙ ආර්ට්ස් කපුගේ ගීතාවලිය ‘සබඳ අපි‘ නමින් ප්‍රත්‍යාවලෝකනය කිරීම ද සුවිශේෂි කාර්යයකි.
